“პატრიოტთა ალიანსი“ მინისტრთა კაბინეტის რამდენიმე კანდიდატურას მხარს არ დაუჭერს. ამის შესახებ პარტიის ლიდერმა ირმა ინაშვილმა ჟურნალისტებს განუცხადა. როგორც ინაშვილმა აღნიშნა, ისინი გიგლა აგულაშვილს, მიხეილ გიორგაძეს და დიმიტრი ქუმსიშვილს მხარს არ დაუჭერენ.
„საქმე იმაშია, რომ წარმოდგენილი მინისტრთა კაბინეტიდან რამდენიმე კანდიდატურას ცალსახად არ ვუჭერ მხარეს. მაგალითად, გარემოს დაცვის მინისტრს - აგულაშვილს მხარს არ დავუჭერთ, ხე-ტყე მასიურად იჭრება, მასიური კორუფციაა ამ სფეროში. ასევე მან პასუხი უნდა აგოს საგარეჯოს არჩევნების გაყალბებისთვის.
მხარს არ დავუჭერთ კულტურის მინისტრსაც, რომელმაც დაანგრია საყდრისი და ხელი მოაწერა საყდრისის ნგრევას, ეს დანაშაული გამოძიებული უნდა იყოს და კულტურის ამჟამინდელმა მინისტრმა პასუხი უნდა აგოს ჩადენილი დანაშაულისთვის. ჩვენ მხარს არ დავუჭერთ დიმიტრი ქუმსიშვილსაც“,- განაცხადა ირმა ინაშვილმა.
მისივე თქმით, „პატრიოტთა ალიანსი“ პასუხისმგებლობას ვერ აიღებს მთავრობაზე.
,,საერთო ჯამში, ჩვენ პასუხისმგებლობას ვერ ავიღებთ ამ გუნდზე. ჩვენ არ ვართ ხელისუფლებაში, რომ შეგვეძლოს გუნდის წარმოდგენა,რომეზეც პასუხისმგებლობას ავიღებდით“,- დასძინა ინაშვილმა.
