ფინანსთა მინისტრობის კანდიდატი დიმიტრი ქუმსიშვილი აცხადებს, რომ ამოცანა არა ლარის კურსის დევნაა, არამედ ამოცანა არის დამოკიდებულების შეცვლა, რომ მოსახლეობას ლარის კურსის ცვლილებასთან ერთად არ ეცვლებოდეს ის განკარგვადი შემოსავალი, რაც მათ რჩებათ გადასახადების და სესხის მომსახურების გადახდის კვალდაკვალ. მისივე თქმით, ამ პოლიტიკას ფინანსთა სამინისტრო ეროვნულ ბანკთან ერთად განახორციელებს.
„მე დიდი იმედი მაქვს, რომ ძალიან მალე ის ზომები, რომელთა გატარებასაც ჩვენ ამ მიმართულებით ვაპირებთ, აუცილებლად გახდება საჯარო. არის მსოფლიოში რამდენიმე ძალიან კარგი მაგალითი, თუ როგორ მოახერხეს ქვეყნებმა დოლარიზაციის დაძლევა და ამავე დროს, როგორ მოახერხეს იმ სოციალური წნეხის მოშორება, რომელიც დღეს ჩვენს ქვეყანას გააჩნია“, - განაცხადა დიმიტრი ქუმსიშვილმა.
მინისტრთა კაბინეტისა და სამთავრობო პროგრამის მოსმენა პარლამენტში 24 ნოემბრიდან დაიწყება. მთავრობის შემადგენლობა და სამთავრობო პროგრამა პარლამენტს უკვე წარედგინა.
