პარლამენტის ჯანდაცვისა და სოციალურ საკითხთა კომიტეტის თავმჯდომარეობის კანდიდატის აკაკი ზოიძის შეფასებით, პრემიერმა და ეროვნული ბანკის პრეზიდენტმა ლარის კურსთან დაკავშირებით, ამომწურავი განცხადებები გააკეთეს.
ზოიძის თქმით, მალე მთავრობა ლარის კურსის გამყარების დამაჯერებელ გეგმას წარადგენს.
"ბოლო პერიოდში, როგორც მთავრობის ხელმძღვანელმა, ისე ეროვნული ბანკის პრეზიდენტმა, ამომწურავი კომენტარი გააკეთეს იმ მიმდინარე მოვლენებზე, რაც ჩვენს მოსახლეობას და მოქალაქეებს ძალიან აწუხებს, ეს არის ლარის კურსი, მოკლევადიანი რყევები. მიზეზები ამომწურავად არის ახსნილი. ეროვნულ ბანკთან და საერთაშორისო სავალუტო ფონდთან კონსულტაციების შემდეგ მთავრობა, ჩვენი გუნდი, ძალიან დამაჯერებელ გეგმას წარმოვადგენთ“, - განაცხადა აკაკი ზოიძემ.
მისივე თქმით, ლარის გაჯანსაღებისთვის საბიუჯეტო პრიორიტეტების სწორად შერჩევაა აუცილებელი.
„აუცილებელია საბიუჯეტო პრიორიტეტების სწორედ შერჩევა, ანუ სწრაფ ეკონომიკურ ზრდაზე ორიენტირებული ბიუჯეტის შექმნა, რაც გულისხმობს ინფრასტრუქტურული ხარჯების მკვეთრ ზრდას, ადმინისტრაციული ე.წ. ბიუროკრატიული ხარჯების შემცირებას. ეს ყველაფერი წარმოდგენილი იქნება მთავრობის მიერ, როცა დამტკიცდება პარლამენტში მთავრობა. პირველივე სესიაზე სწორედ ახალი ბიუჯეტი განიხილება, სადაც ეს პრიორიტეტები ნათლად იქნება ასახული.
რაც შეეხება ლარის დედოლარიზაციის პროგრამას, ამის შესახებ ეროვნული ბანკი დიდი ხანია საუბრობს. გარკვეული ზომები იქნა მიღებული, მათ შორის დეპოზიტებთან მიმართებაში, მაგრამ მთავარი ამოცანა დედოლარიზაციის, ისაა, რომ ეროვნულ ვალუტაში აღებული სესხებიც და დეპოზიტებიც წახალისდეს. ამ მიზნით, მთავრობასთან ერთად, როგორც უკვე ითქვა, გამოქვეყნდება სამოქმედო გეგმა, სადაც საუბარი იქნება სწორედ საბაზრო მექანიზმებზე და არა უხეშ რეგულაციებზე, რომელიც ხელს შეუწყობს იმას, რომ ადამიანებს მეტი სტიმული მიეცემათ, რათა როგორც დანაზოგები, ისე სესხები ლარში აიღონ“, - განაცხადა ზოიძემ.
