14 ნოემბერს იწყება მოგზაურობა იტალიური მოდის სამყაროში - თბილისში პირველად იქნება წარმოდგენილი გამოფენა "იტალიური მოდის ისტორიის 60 წელი", რომელსაც ზურაბ წერეთლის თანამედროვე ხელოვნების მუზეუმი უმასპინძლებს.
გამოფენის გახსნას წინ უძღვის პრესკონფერენცია, რომელიც გაიმართება 14 ნოემბერს, 12:00 საათზე, საქართველოს კულტურისა და ძეგლთა დაცვის სამინისტროში. პრესკონფერენციაზე მონაწილეობას მიიღებენ საქართველოს კულტურისა და ძეგლთა დაცვის მინისტრი ბატონი მიხეილ გიორგაძე, ქ. თბილისის მერის მოადგილე ქალბატონი ნინა ხატისკაცი, იტალიის ელჩის ანტონიო ენრიკო ბარტოლი და, ასევე, გამოფენის კურატორი კომპანიის “Galgano&Tota”-ს წარმომადგენლები ალესია ტოტა და ფიორელა გალგანო, ზურაბ წერეთლის თანამედროვე ხელოვნების მუზეუმისა და გამოფენის სპონსორის „ვითიბი“ ვანკის წარმომადგენლები.
14 ნოემბერს, 19:00 საათზე გამოფენის გახსნაზე მოწვეულთა შორის არიან საქართველოს ხელისუფლების და დიპლომატიური კორპუსის წარმომადგენლები, მოდის სფეროში მომუშავე იტალიური და ქართული კომპანიები, საპატიო სტუმრები და ჟურნალისტები. გამოფენის ნახვის შესაძლებლობა ნებისმიერ მსურველს მიეცემა უკვე 15 ნოემბრიდან 2017 წლის 10 იანვრამდე, ზურაბ წერეთლის თანამედროვე ხელოვნების მუზეუმის სამუშაო საათებში.
გამოფენაზე, რომელიც სტილისა და ელეგანტურობის ისტორიას მოგითხრობთ, იხილავთ იტალიური შემოქმედების საუკეთესო ნიმუშებს, მაღალი მოდისა და prêt-à-porter-ს უნიკალურ ტანსაცმელს: Valentino, Emilio Schuberth, Sorelle Fontana, Roberto Capucci, Sarli, Lancetti, Renato Balestra, Marella Ferrera, Brioni, Giorgio Armani, Laura Biagiotti, Roberto Cavalli, Dolce & Gabbana, Fendi, Salvatore Ferragamo, Gianfranco Ferré, Gucci, Crizia, Max Mara, Missoni, Moschino, Prada, Trussardi, Versace და სხვა სახელგანთქმული იტალიური მოდის სახლებისა და დიზაინერების საუკეთესო ქმნილებებს. წარმოდგენილი იქნება 70-მდე ექსპონატი.
კომპანია Galgano&Tota-ს მიერ ჩაფიქრებულ და განხორციელებულ ექსპოზიციას დიდი წარმატება ხვდა წილად იტალიისა და უცხოეთის პრესტიჟულ საგამოფენო სივრცეებში. საქართველოში გამოფენა გაიმართება იტალიის საელჩოს ორგანიზებით, საქართველოს კულტურისა და ძეგლთა დაცვის სამინისტროს და თბილისის მერიის კულტურული ღონისძიებების ცენტრის მხარდაჭერით. ღონისძიების სპონსორია ბანკი "ვითიბი".
