”ქართული ოცნების” წევრი ნუკრი ქანთარია მიიჩნევს, რომ ბაგა-ბაღში ,,ქორწინების“ სცენის დადგმაში საგანგაშო არაფერია. მისი თქმით, საბავშვო ბაღში ყველას ჰყავს შეყვარებული – ,,მაშინ ავკრძალოთ შეყვარებულობა ბაღში“.
”ადრე დავდგი სპექტაკლი – რეზო ინანიშვილის ”ალალი”, რომელიც საკმაოდ პოპულარული იყო. მთელი სიუჟეტი იმაზეა, რომ კაცმა, რომელიც მთელი სოფლისათვის საყვარელი ადამიანი იყო, თავისი შვილიშვილი და მეგობრის შვილიშვილი თამაშ-თამაშში დააქორწინა. არის ქეიფი, ერთი ამბავი, სადაც შემდეგ ჩაერია საბჭოები, პოლიცია და ეს ამბავი ტრაგიკულად დამთავრდა. დაახლოებით ასეთი თამაში მოეწყო ბაღში, რაც მე არც სერიოზულად მიმაჩნია და არც მისაღებად. მაგრამ, ამაზე სკანდალის ატეხვა, სახალხო დამცველის დონეზე აყვანა, არ იქნება სწორი. უბრალოდ, ჩვენ მასწავლებლებს უნდა ვურჩიოთ, რომ არის რაღაც, რისი თამაშისგან შეიძლება თავი შეიკავონ. ბომბი არ გამსკდარა, ამ ბავშვებმა ითამაშეს – რა მოხდა, სახლში წაიყვანენ ერთმანეთს თუ ჯვარი დაიწერეს?! ეს დადგმა ან დაამახსოვრდებათ ან არა. თუკი ბაღში ყოფილხართ, ყველას ჰყავს შეყვარებული, მაშინ ავკრძალოთ შეყვარებულობა ბაღში. ჩემმა შვილიშვილმა რომელიც 5 წლის არის, დიდი სიამაყით გამოაცხადა, რომ უყვარს გოგონა ბაღში. ეს არის ელემენტარული ადამიანური ამბავი”, – განაცხადა ნუკრი ქანთარიამ დღეს გამართულ პრესკონფერენციაზე.
თბილისის 56-ე საბავშვო ბაგა-ბაღში გამართულ ღონისძიებაზე დაუყოვნებლივი რეაგირებას ითხოვს სახალხო დამცველი. უჩა ნანუაშვილი ფიქრობს, რომ აღმზრდელობითი პროცესის ამგვარად წარმართვა ბავშვის საუკეთესო ინტერესებს ეწინააღმდეგება და მისი ცნობიერების ფორმირებაზე მავნე ზეგავლენას ახდენს. სოციალურ ქსელში გავრცელდა ვიდეოჩანაწერი, სადაც საბავშვო ბაგა-ბაღის აღსაზრდელები „ქორწინების“ სცენაში მონაწილეობენ. ომბუდსმენის საპასუხოდ ბაგა-ბაღების მართვის სააგენტოში განმარტეს, რომ ღონისძიება სასწავლო კურსის ფარგლებში დაიდგა, თუმცა აღნიშნავენ, რომ გადამეტებული იყო, ამიტომ, აღმზრდელი და ბაღის დირექტორი საყვედურს მიიღებენ. საკითხს თბილისის მერიც გამოეხმაურა. დავით ნარმანიას შეფასებით, ასეთი სახისღონისძიება მისთვის კატეგორიულად მიუღებელია.
