პარლამენტის თავმჯდომარის დავით უსუფაშვილის განცხადებით, 8 ოქტომბერს, საქართველოს მოქალაქეებს ჰქონდათ თავისუფალი არჩევანის გაკეთების გაცილებით უკეთესი საშუალება, ვიდრე წინა საპარლამენტო არჩევნების დროს.
უსუფაშვილის თქმით, ეს ქვეყნის გაძლიერებისთვის მნიშვნელოვნად წინგადადგმული ნაბიჯია.
”8 ოქტომბრის არჩევნებიდან საკმაო დრო გავიდა იმისთვის, რომ შევძლოთ არჩევნების წინასწარი ტექნიკური და პოლიტიკური შედეგების შეჯამება. მე ვთვლი და ეს არის ძალიან სასიამოვნო, რომ 8 ოქტომბერს საქართველოს მოქალაქეებს ჰქონდათ თავისუფალი არჩევანის გაკეთების გაცილებით უკეთესი შესაძლებლობა ვიდრე წინა საპარლამენტო არჩევნების დროს. ეს არის წინგადადგმული ნაბიჯი ჩვენი ქვეყნის, ჩვენი სახელმწიფოს გაძლიერებისთვის. საარჩევნო პროცესში ბევრი ხარვეზი იყო, იყო სერიოზული ხარვეზებიც, იყო დანაშაულის ნიშნებიც და ალბათ ვიხილავთ კომპეტენტური ორგანოების გადაწყვეტილებებსაც. მიუხედავად ამისა, არ არსებობს არანაირი საფუძველი ეჭქვეშ დადგეს საარჩევნო პროცესის ან არჩევნების შედეგების ლეგიტიმურობა. არჩევნები შედგა, არჩევნები დასასრულებელია, ვინაიდან უმეტეს მაჟორიტარულ ოლქებში მეორე ტურია ჩასატარებელი, მაგრამ ჩვენ შეგვიძლია ვთქვათ, რომ არჩევნები შედგა. შედეგად, მივიღებთ ახალ პარლამენტს, ახალ პოლიტიკურ რეალობას და ამ მიმართულებით უნდა იყოს მეტი განსჯა და მეტი ანალიზი”, - განაცხადა უსუფაშვილმა.
მისივე თქმით, საარჩევნო პროცესში მონაწილე ყველა ძირითადმა სუბიექტმა, მასზე დაკისრებულ მოვალეობას ძირითადად, თავი გაართვა, თუმცა აღნიშნულ პროცესშიც ისურვებდა, მეტი ორგანიზებულობა და როლების უკეთ გააზრება ყოფილიყო.
„საარჩევნო ადმინისტრაციის საქმიანობაში აშკარად შეინიშნებოდა კვალიფიკაციის ნაკლებობა ბევრ შემთხვევაში და ამან გარკვეული ხარვეზი უზრუნველყო. ჩემთვის განსაკუთრებით შემაშფოთებელია და მინდა ყველამ ვიზრუნოთ, რომ ეს აღარ განმეორდეს, როდესაც არჩევნების შედეგების გამოქვეყნების პროცესში, სრულიად აშკარად იგრძნობოდა ფარული ხელი იმის უზრუნველსაყოფად, რომ მოსახლეობას არჩევნების საბოლოო შედეგების შესახებ, ინფორმაცია გარკვეული პორციებით, გარკვეული ლოგიკით მიგვეღო“, - განაცხადა უსუფაშვილმა.
მისივე შეფასებით, სამწუხაროდ, პროცესი იმ ტენდენციების გაგრძელება იყო, რომელიც წინასაარჩევნო კამპანიის დროს მოსახლეობამ შემთხვევით, სწორ დროს გამოქვეყნებული ფარული ჩანაწერებითა და იარაღის სამალავის აღმოჩენით იხილა.