2016 წლის საპარლამენტო არჩევნების წინასწარი შედეგების შესახებ ექსპერტები საუბრობენ. გია ხუხაშვილი ამბობს, რომ ნაციონალურ მოძრაობას 2 სცენარით მოქმედება შეუძლია.
ერთ-ერთი სცენარი ნაციონალური მოძრაობის წევრების პარლამენტში არშესვლაა, რაც ხუხაშვილის აზრით, პარლამენტის ლეგიტიმაციის საკითხს კითხვის ნიშნის ქვეშ დააყენებს.
მეორე სცენარი კი ასეთია "2020 წლისთვის ქართული ოცნება საგრძნობლად იქნება დასუსტებული, ნაცებს ექნება საშუალება, რომ 2020 წლისთვის ხელისუფლებაში დაბრუნდეს,"- განაცხადა გია ხუხაშვილმა.
ბაია პატარაია კი წუხილს გამოთქვამს, რომ ზღვარს მიღმა დარჩენილმა დასავლური ორიენტაციის მქონე პარტიებმა ბარიერის გადალახვა ვერ შეძლეს. პატარაია ამბობს, რომ პარლამენტის მუშაობას ეს პარტიები დააკლდება.
ექსპერტი თორნიკე შარაშენიძე ფიქრობს, რომ ერთპარტიული პარლამენტი ქვეყნისთვის საზიანო იქნება.