სულხან მოლაშვილის მეგობრები კონტროლის პალატის ყოფილი თავმჯდომარის საქმის გადაკვალიფიცირებას ითხოვენ. ნანა კაკაბაძემ ჟურნალისტებს განუცხადა, რომ სულხან მოლაშვილის საქმეზე გამოძიება უფლებამოსილების გადამეტების მუხლით მიმდინარეობს.
„ჩვენი მოთხოვნაა, რომ საქმე ჯგუფურად წამების მუხლით გადაკვალიფიცირდეს, რადგან სულხან მოლაშვილი წამებას შეეწირა“, - განაცხადა კაკაბაძემ.
მისივე თქმით, სტრასბურგის სასამართლომ საქართველოს მთავრობას გადაუგზავნა დასკვნა, სადაც წერია, რომ სულხან მოლაშვილის მიმართ წამება და არაადამიანური მოპყრობის ნიშნები იყო.
სულხან მოლაშვილის ოჯახმა დღეს განცხადებც გაავრცელა, სადაც მოსახლეობას პეტიციაზე ხელის მოწერისკენ მოუწოდებენ.
“მივმართავთ სულხან მოლაშვილის პეტიციაზე ხელმომწერებს - პირველ რიგში, დიდ მადლობას გადაგიხდით ყველას სულხანისა და ჩვენი ოჯახის მხარდაჭერისთვის. გვსურს, აღნიშნულ მიმართვაში თქვენი ყურადღება ორ მნიშვნელოვან საკითხზე გავამახვილოთ, მითუმეტეს წინასაარჩევნო პერიოდის გათვალისწინებით ორივე საკითხი სასიცოცხლოდ მნიშვნელოვნად მიგვაჩნია. პირველი - აუცილებლად უნდა დაისაჯოს სულხანის საქმეში მონაწილე ყველა დამნაშავე. ხოლო მეორე საკითხი ეხება ისეთ თემას, რომელიც ყველაზე პრინციპულია ჩვენთვის - ძალადობა, რომელიც ხდებოდა სააკაშვილის რეჟიმის დროს, არ უნდა იყოს დავიწყებული, ამიტომ გვსურს, საზოგადოებას შევახსენოთ ის სისასტიკე, რითიც იმართებოდა ჩვენი ქვეყანა, რომელიც საზოგადოების დიდმა ნაწილმა საკუთარ თავზე გამოსცადა. მოგმართავთ, პეტიციაზე ხელის მომწერებს, რათა შევიკრიბოთ და დავგეგმოთ ერთჯერადი აქცია, ძალადობრივი რეჟიმის მსხვერპლთა პატივის მისაგებად და წამებისა და სისასტიკის დასაგმობად“,-ნათქვამია სულხან მოლაშვილის ოჯახის განცხადებაში.
