,,ნაციონალური მოძრაობა“ ,,ქართული ოცნების“ ბრალდებებს ეხმაურება, რომლის თანახმადაც, ენმ-ის აქტივისტები ლევან გოგიჩაიშვილის შტაბში იარაღით შევიდნენ და პროვიკაციის მოწყობა სცადეს. სერგო რატიანის განცხადებით, ,,ქართული ოცნების“ აღმასრულებელი მდივანი ფსიქიკური აშლილობის ზღვარზეა.
„როდესაც სახელისუფლებო პარტია აგებს, მესმის, რომ მისი აღმასრულებელი მდივანი ფსიქიკური აშლილობის ზღვარზეა, მაგრამ მეორე მხრივ ჩვენ ვხედავთ, რომ ოთხი წლის განმავლობაში მიზანმიმართული ტყუილი და ცილისწამება არის, ,,ქართული ოცნება“ საბოლოოდ დიდ ქართულ ტყუილად ჩამოყალიბდა,“- განაცხადა სერგო რატიანმა.
ირაკლი კობახიძემ დღეს გამართულ პრესკონფერენციაზე განაცხადა, რომ „ნაციონალური მოძრაობის“ 3 აქტივისტი გუშინ, გამთენიისას ლევან გოგიჩაიშვილის ოფისში, იარაღით შევიდა. ,,აქედან ორი აქტივისტი იყო სევდია უგრეხელიძის შტაბის წევრი, ერთ-ერთი უბნის კოორდინატორი, ორ მათგანს ეცვა „ქართული ოცნების“ მაისურები და ორივეს ჰქონდათ ჩადებული ქამარში პისტოლეტები. ისინი შევიდნენ ოფისში, დაიწყეს საუბარი ჩვენს აქტივისტებთან, როგორც მოგვიანებით გაირკვა, პროვოკაციის მიზანი იყო ამ ფაქტის გარედან გადაღება და შემდეგ ტელევიზიის საშუალებით იმის ჩვენება, რომ თითქოს „ქართული ოცნების“ შტაბებში იკრიბებიან შეიარაღებული ადამიანები და კრიმინალური მიდრეკილების მქონე ადამიანები. ფაქტია, რომ „ნაციონალური მოძრაობა“ ვერ ცვლის მოქმედების სტილს. ისინი ძლიერები არიან ბინძური პროვოკაციების მოფიქრებაში, თუმცა, აშკარაა, რომ მათ ამ პროვოკაციების აღსრულების რესურსი რეალურად აღარ აქვთ”, - განაცხადა ირაკლი კობახიძემ.
მისივე თქმით, „ქართული ოცნების“ აქტივისტები სამართალდამცავებს დაუკავშირდნენ.