პაატა ბურჭულაძის პარტიის აჭარის უმაღლესი საბჭოს არჩევნებში სიის პირველი ნომერი გიორგი კალაძე ხათუნა ლაგაზიძის მიერ გამოთქმულ ბრალდებებს ეხმაურება და აცხადებს, რომ ლაგაზიძეს მისგან საფრთხე არ ემუქრება.
„შემიძლია დავარწმუნო, რომ ჩემგან არავითარი საშიშროება არ არის. მე საკმაოდ დაკავებული ვარ აჭარაში მუშაობით, საარჩევნო კამპანიით და დარწმუნება შემიძლია მაგ ქალბატონის, რომ არავითარი საფრთხე არ ემუქრება. ეს მისი სულელური გამოხტომებია... პროკურატურაში დაბარების შესახებ ჟურნალისტებისგან გავიგე, მაგრამ არაფერი არ მაბრკოლებს იმისგან, რომ მივიდე და ერთხელ და სამუდამოდ დავუსვა წერტილი ქალბატონი ხათუნას უსაგნო ბრალდებებს” - აცხადებს კალაძე.
მისივე თქმით, კრიმინალური წარსული არ ჰქონია.
,,მე ვიყავი 18 წლის, როცა საქართველოდან წავედი ბრიტანეთში სასწრავლებლად და დავბრუნდი 2004 წელს. ამის მერე, თუ რამე დამიშავებია, ალბათ აღრიცხული იქნება და ამის გადამოწმება არაა რთული. თუ რამე სხვა ინფორმაცია აქვს, წარუდგინოს პროკურატურას", - აღნიშნა კალაძემ.
ამასთანავე, იგი არ უარყოფს პარტიაში მუშაობისას ლაგაზიძესთან არსებულ უთანხმოებას.
"ვმუშაობდით ერთად რამდენიმე თვე, ყოველდღიური შეხება გვქონდა, გეგმებს ვსახავდით და ვახორციელებდით. ჩვენთან ყველაფერი განიხილებოდა გუნდურად, სადაც იყო კამათი, ხმის აწევები - ამას თუ გულისხმობს ზეწოლაში არ ვიცი. რახან სხვა კუთხით ვერ მოძებნა და აქვს გამოგონილი ცრუ ბრალდება, ცდილობს საზოგადოების შეცდომაში შეყვანას. მესმის, რომ სიაში ვერ მოხვდა, მაგრამ ეს არ უნდა იყოს მიზეზი, რომ პაატა ბურჭულაძის ბლოკს ზიანი მიაყენოს და მოსახლეობა შეცდომაში შეიყვანოს", - აღნიშნა გიორგი კალაძემ.
ხათუნა ლაგაზიძემ „სახელმწიფო ხალხისთვის“ დატოვების შემდეგ განაცხადა, რომ მის ოჯახს საფრთხე ემუქრებ კრიმინალური მენტალობის მქონე ადამიანებისგან, რომლებმაც პარტიის საარჩევნო სია დააკომპლექტეს. კრიმინალური მენტალობის ადამიანი მან გოგა კალაძეს უწოდა.
