ლიტვის საგარეო საქმეთა მინისტრი რუსეთს ცეცხლის შეწყვეტის შესახებ მედვედევ-სარკოზის ხელშეკრულების შესრულებისკენ კიდევ ერთხელ მოუწოდებს.
ვიგაუდას უშაცკასმა საქართველო- რუსეთისა და რუსეთი-ევროკავშირის ურთიერთობებზე ამჯერად "ინტერფაქსთან" ინტერვიუში ისაუბრა.
მისი თქმით, ევროკავშირს რუსეთთან ურთიერთობის გაღრმავება სურს, თუმცა მოსკოვმა უნდა გააცნობიეროს, რომ საქართველო და უკრაინა ამ ორგანიზაციის მეგობარი ქვეყნები არიან.
ამასთან, უშაცკასი მიიჩნევს, რომ საქართველოს ტერიტორიული მთლიანობა რუსეთსა და ევროკავშირს შორის ახალ ხელშეკრულებაშიც უნდა იყოს დაცული.
"მნიშვნელოვანია, რომ ყველა ქვეყანამ შეასრულოს შეთანხმება. ეს ეხება ევროპის უსაფრთხოების თაობაზე რუსეთის წინადადებასაც. სახელმწიფოების, მათ შორის საქართველოს ტერიტორიული მთლიანობა კი არის უსაფრთხოების ერთ-ერთი პრინციპი", - აცხადებს უშაცკასი.
