მცხეთის დამოუკიდებელი მაჟორიტარობის კანდიდატი, ცეზარ ჩოჩელი, ,,ქართული ოცნების“ დეპუტატის გია ვოლსკის განცხადებას ეხმაურება, რომლის თანახმადაც, გამოძიება უნდა დაიწყოს ჩოჩელის მხრიდან მცხეთაში ამომრჩევლის შესაძლო მოსყიდვის ფაქტზე.
,,სრულიად სამარცხვინოა ეს განცხადება, ვოლსკი არის მაღალი თანამდებობის პირი. ის წუხელ იმყოფებოდა წეროვანში და სჯობდა თავის მეგობრისთვის დაესვა კითხვა, რატომ დასჭირდა დაახლოებით 250 კაცის მობილიზება სხვადასხვა სოფლებიდან და რაიონებიდან ,როდესაც იმ დასახლებაში, სადაც იმყოფებოდნენ იყო დაახლოებით 5500 ამომრჩეველი და იქიდან დაახლოებით 58 იმყოფებოდა შეხვედრაზე. ეს მეტყველებს იმაზე,რომ ფულის დარიგებაც, დაშინებაც და მოსყიდვაც სჭირდებათ ხუნდაძის დასახმარებლად. ვურჩევდი ნუ გადააყოლებენ თავის პარტიის ინტერესებს ხუნდაძის ინტერესებს,“-აცხადებს ჩოჩელი.
მისი თქმით, მას არასდროს არავინ მოუსყიდია და არავისთან გარიგებაში არ შესულა.
,,ეს არჩევნები არც დასაწყისია და არც დასასრული. ურჩევნიათ სხვა თემებზე გაამახვილონ ყურადღება და უკვე სირცხვილია ამ კაცის ხელით ტარება სოფელ-სოფელ და სხვათაშორის მზადდება ერთი სარჩელი ზაქარია ქუცნაშვილთან დაკავშირებით და ამ დღეებში შევა. მე ვურჩევდი მათ, ნაბახუსევი არ მივიდნენ მოსახლეობასთან შეხვედრაზე. ეს ინფორმაცია არის იმ ხალხის ინფორმაცია, შეგიძლია წახვიდეთ და იმ ხალხს ჰკითხოთ , ყოველ შემთხვევაში მთელი წეროვანი საუბარობს, რომ არ იყვნენ ფხიზელ მდგომარეობაში. მრცხვენია ვიცე პრემერის თანდასწრებით ასე უხამსად რომ იქცევიან და იმის ნაცვლად რომ მოახდინონ პროგრამის წარდგენა ხდება ცილისწამების გავრცელება. „-აცხადებს ცეზარ ჩოჩელი.