საკონსტიტუციო სასამართლოს თავმჯდომარე გიორგი პაპუაშვილის შეფასებით, საკონსტიტუციო სასამართლომ შეძლო დაემტკიცებინა, რომ შეუძლია დაიცვას დამოუკიდებლობა და პრინციპები.
რაც შეეხება პლენუმის 30 სექტემბრამდე შეკრების საკითხს, მან განაცხადა, რომ „ისინი ყოველდღე მუშაობენ და ხელფასსაც“ იღებენ.
„ჩვენ ყოველდღე ვმუშაობთ, ხელფასსაც ამიტომ ვიღებთ, რომ სამსახურში უნდა დავდიოდეთ ორშაბათს, სამშაბათს, ოთხშაბათს, ხუთშაბათს, პარასკევს და ხანდახან შაბათ-კვირასაც, თუ ამის აუცილებლობაა“, - აღნიშნა გიორგი პაპუაშვილმა.
საქართველოს საკონსტიტუციო სასამართლო დაარსებიდან 20 წლისთავის აღსანიშნავ საიუბილეო თარიღთან დაკავშირებით საერთაშორისო კონფერენციას მართავს, თემაზე „კონსტიტუციური მართლმსაჯულება გარდამავალ დემოკრატიაში: კონსტიტუციური კონტროლის მიღწევები და გამოწვევები საქართველოსა და აღმოსავლეთ ევროპაში“. საკონსტიტუციო სასამართლოს მიერ ორგანიზებულ კონფერენციას ესწრებიან ადამიანის უფლებათა ევროპული სასამართლოს ვიცე-პრეზიდენტი, ევროსაბჭოს ვენეციის კომისიის, საქართველოსა და ევროპის საკონსტიტუციო სასამართლოების თავმჯდომარეები და წევრები, საქართველოს უზენაესი სასამართლოს, საქართველოს პარლამენტის, დიპლომატიური კორპუსის, აკადემიისა და საერთაშორისო ორგანიზაციების წარმომადგენლები. კონფერენცია იმართება ევროკავშირის პროექტის „საკონსტიტუციო სასამართლოს მხარდაჭერის“, გერმანიის საერთაშორისო თანამშრომლობის ორგანიზაციისა (GIZ) და ევროპის საბჭოს ვენეციის კომისიის მხარდაჭერით. კონფერენცია დღეს სრულდება.
