,,ქართული ოცნება - დემოკრატიული საქართველოს“ ახალი სახე, სოფო კილაძე აცხადებს, რომ პარტიის მიერ წარდგენილი საარჩევნო პროგრამა არის რეალისტური და ადამიანზე ორიენტირებული.
,,ჩვენი მთავრობისთვის პრიორიტეტია თითოეულ ადამიანამდე კეთილდღეობის მისვლა. სწორედ ამას ეძღვნება მთელი ჩვენი პროგრამა. ეს იქნება ეკონომიკა, დასაქმება, სამუშაო ადგილები... უამრავი სამუშაო ადგილი შეიქმნება (როგორც ბატონმა პრემიერმა ბრძანა), განათლება იქნება პრიორიტეტული მიმართულება, ადამიანის უფლებები თავისთავად, კიდევ უფრო განტკიცდება, ასევე კულტურა, სპორტი და, რა თქმა უნდა, სოციალური მიმართულება. მოკლედ, ადამიანი, მისი კეთილდღეობა იქნება უნიშვნელოვანესი ჩვენი პროგრამის ფარგლებში“, - განაცხადა ,,ტაბულასთან“ საუბარში დეპუტატობის კანდიდატმა.
კითხვაზე, თუ რატომ არ წარადგინა საარჩევნო პროგრამა პარტიამ უფრო ადრე, მან განაცხადა, რომ ეს პასუხისმგებლიანი ხელისუფლების გათვლა იყო.
,,ჩვენ ვართ პასუხისმგებლიანი ხელისუფლება. ჩვენ გავაკეთეთ ზუსტი გათვლები. უპასუხისმგებლო, ისეთი რაც არ შესრულდება, არაფერი არ არის ჩვენს პროგრამაში, ამიტომ ამას დასჭირდა გარკვეული დრო, სადაც შევაჯერეთ ყველა დეტალი. მე თავად გახლდით სოციალური მიმართულების ხელმძღვანელი და ზუსტად ვიცი, რა კოლოსალური სამუშაო ჩატარდა ამ მიმართულებით. კიდევ ერთხელ ვიტყვი, რომ ეს არის პასუხისმგებლიანი ხელისუფლების პროგრამა» , - აღნიშნავს სოფო კილაძე.
