ექს-პრემიერი ბიძინა ივანიშვილი ზვიად გამსახურდიასთან დაკავშირებით გაკეთებულ განცხადებას განმარტავს, რომლის თანახმადაც, საქართველოს პირველი პრეზიდენტი პოლიტიკურად გამოუცდელი იყო.
ზუგდიდში ჟურნალისტებთან გამართულ შეხვედრაზე მან განაცხადა, რომ გამსახურდიას დროს მოხდა ყველაზე დიდი გაერთიანება საქართველოში და მას დიდ პატივს სცემს.
,,ალბათ არასწორად გაიგეთ, მე ვახსენე ზვიად გამსახურდია და ვთქვი, რომ დიდ პატივს ვცემ. მისი მამა ჩემი საყვარელი მწერალია, ზვიადის დროს მოხდა ყველაზე დიდი აღზევება და გაერთიანება საქართველოში. ზვიადის მმართველობის დროს მივაღწიეთ პიკს. ახალმა ხელისუფლებამ მოახერხა მის მკვლელობაზე საქმე გადაეტანა განზრახ მკვლელობაზე და გამოძიება გრძელდება და დიდი ეჭვი მაქვს რომ ის მოკლეს. თუ რამე მმართველობაზე ვთქვი, ამ კონტექსტში ვიგულისხმე გამოუცდელი ხელისუფლება იყო. 25 წელია მოჯადოებულ წრეზე ვტრიალებთ და ზვიად გამსახურდიამ დაიწყო ამ მოჯადოებულ წრეზე სიარული და გამოუცდელობაც ჰქონდა და ყველაზე დიდი გამოუცდელობა იმ გუნდს გააჩნდა დღეს კი ჩვენ მივიღეთ ხელისუფლება, რომელსაც უკვე გამოცდილება აქვს,“-განაცხადა ივანიშვილმა.
რამდენიმე დღის წინ ჟურნალისტებთან შეხვედრაზე ივანიშვილმა განაცხადა, რომ ,,დიდ პატივს ვცემ ზვიად გამსახურდიას, მაგრამ მართვას უნდა ცოდნა. მხოლოდ ის არაა, რომ გიყვარდეს და გული გეწვოდეს, ამავდროულად გამოცდილება და შესატყვისი მანერები უნდა გქონდეს.”