"რესპუბლიკური პარტიის" წევრი, დავით ბერძენიშვილი გია ვოლსკის მიერ გაკეთებულ განცხადებას ეხმაურება და აცხადებს, რომ ,,რესპუბლიკელები ხვალ, პარლამენტში მივლენ.
ბერძენიშვილმა ვოლსკის ურჩია, მხოლოდ მისი ფრაქციის სახელით ილაპარაკოს, რადგან „რესპუბლიკელები“ ხვალ პარლამენტში მიდიან.
"რას ჰქვია მუშაობა დაასრულა? რეგლამენტში არ იხედებიან? გია ვოლსკიმ ილაპარაკოს თავისი ფრაქციის სახელით, ჩვენ მუშაობას ვაგრძელებთ. არ არიან კონკურენტუნარიანები პარლამენტში და ამიტომაც არ დადიან", - განაცხადა დავით ბერძენიშვილმა.
საპარლამენტო უმრავლესობის წევრმა გია ვოლსკიმ განაცხადა, რომ ერთი თვე პარლამენტი არ იმუშავებს. მისივე თქმით, არც ხვალ დაგეგმილ სესია გაიმართება, რადგან არსებობს ტექნიკური პრობლემა,
"ტექნიკური პრობლემა ნამდვილად არსებობს, საზოგადოების წინაშეც არ ვიქნებით პირნათელი, თუ დავრაზმავთ გარკვეულ თანხას, დავირაზმებით ქუთაისში და გადაწყვეტილებებს ვერ მივიღებთ. კვორუმიც რომ შედგეს, ძნელი იქნება, რომ გუშინდელმა მოკავშირეებმა და ამჟამად ოპონირების რეჟიმში მყოფმა ხალხმა შეძლოს კონსესუსის მიღწევა. გარდა ამისა, ვფიქრობ, რომ საზოგადოება დაინტერესებულია მისი მანდატის მქონე დეპუტატის მიერ მიღებული სტაბილური გადაწყვეტილებით და არა გადაწყვეტილებების ვერ მიმღები პარლამენტის მსჯელობით", - განაცხადა გია ვოლსკიმ.
მისივე თქმით, თვალთმაქცობა იქნება, ხვალ რომ სესია გამოცხადდეს, ვერ შედგეს და ახალი სკანდალური თემები წამოიწიოს.
"რელამენტის მიხედვით, დღეს რომ იყოს 7 რიცხვი, პარლამენტი ხვალიდან უკვე ვერ განახორციელებს თავის საქმიანობას ანუ ერთი დღის ამბავია. 8 ოქტომბრამდე ანუ არჩევნებამდე ერთი თვით ადრე პარლამენტი წყვეტს საქმიანობას. ერთი თვის განმავლობაში პარლამენტი არ იმუშავებს. გაინტერესებთ ხელფასს მივიღებთ თუ არა გაინტერესებთ? - დიახ, მივიღებთ", - აღნიშნა დეპუტატმა.