ვწუხვარ, რომ ბიძინა ივანიშვილისთვის პოტენციური პარტნიორი უფრო „პატრიოტთა ალიანსია“, ვიდრე „რესპუბლიკელები“, ან „თავისუფალი დემოკრატები“, - განაცხადა პარლამენტის თავმჯდომარე დავით უსუფაშვილმა, რითაც ექსპრემიერის მიერ გუშინ, ,,რესპუბლიკელების“ მიმართ გამოთქმულ კრიტიკას გამოეხმაურა.
,,მე ვწუხვარ, რომ ბიძინა ივანიშვილმა 2016 წლის საპარლამენტო არჩევნებისთვის სხვა პროექტი წარმოადგინა, იმისგან განსხვავებული, რაც 2011-2012 წლებში ჰქონდა და ამ პროექტში მისი პოტენციური პარტნიორი უფრო „პატრიოტთა ალიანსია“, ვიდრე „რესპუბლიკური პარტია“, ან „თავისუფალი დემოკრატები“. „რესპუბლიკელებს“ აღმოგვიჩინა პრობლემა, რომ თურმე ილია ჭავჭავაძეს ცუდ კაცად ვთვლით. მე ვწუხვარ, რომ აქამდე დავიდა ეს კრიტიკა. ეს არ არის სწორი და კარგი”, - განაცხადა უსუფაშვილმა.
მისი შეფასებით, 4 წელი „რესპუბლიკელებმა“ აკეთეს ის, რაც შეეძლოთ ქვეყნის სასიკეთოდ იმ პარტნიორებთან ერთად, ვისთანაც ურთიერთობა იყო შესაძლებელი.
,,არჩევნების წინ ყველა პარტია და პოლიტიკოსი თავის არჩევანს აკეთებს. ჩვენი არჩევანი უცვლელია. ჩვენ ვართ მზად პროდასავლურ დემოკრატიულ ძალებთან მჭიდრო ურთიერთობისთვის პარლამენტშიც, მის გარეთაც. თუ ივანიშვილი ახლა უკვე სხვანაირად უყურებს მოვლენებს, ეს მისი უფლებაა. კარგია, რომ ის ამას ეუბნება ქართველ ხალხს. ცუდია, რომ ჩვენს საერთო პროექტზე, რომელიც გულისხმობდა გაძლიერებულ, დემოკრატიულ „ქართულ ოცნებას“, მან უარი თქვა”, - აღნიშნა უსუფაშვილმა.