აღესრულა თუ არა უზბეკეთის პრეზიდენტი? ისლამ კარიმოვის გარდაცვალებასთან დაკავშირებით მთელი დღის განმავლობაში განსხვავებული ინფორმაცია ვრცელდება.
ცოტა ხნის წინ სააგენტო ინტერფაქსმა უზბეკეთის მთავრობის ინფორმაციაზე დაყრდნობით კარიმოვის გარდაცვალების ფაქტი დაადასტურა, თუმცა ოფიციალურმა ტაშკენტმა პრეზიდენტის გარდაცვალება უარყო, რის შემდეგაც სააგენტოს ვებ-გვერდიდან ინფორმაცია გაქრა.
მანამდე უზბეკეთის ლიდერის დაღუპვის შესახებ ინფორმაცია სააგენტო როიტერმა დიპლომატიურ წყაროებზე დაყრდნობით გაავრცელა, თუმცა კონკრეტული წყარო არც როიტერს მიუთითებია.
პრესაში გავრცელებულ დაუზუსტებელ ინფორმაციას უკვე გამოეხმაურა თურქეთის პრემიერ-მინისტრი ბინალი ილდირიმი, რომელმაც უზბეკ ხალხს პრეზიდენტის გარდაცვალება მიუსამძიმრა. კარიმოვის გარდაცვალების გამო მწუხარება საქართველოს პრეზიდენტმაც გამოთქვა.
ისლამ კარიმოვის გარდაცვალების შესახებ ინფორმაცია პირველად 29 აგვისტოს გავრცელდა, თუმცა აღესრულა თუ არა ნამდვილად უზბეკეთის ლიდერი, დღემდე გაურკვეველია.
ერთადერთი, რაც ამ დრომდე დადასტურდა, ის არის, რომ 27 აგვისტოს კარიმოვი ინსულტით საავადმყოფოში გადაიყვანეს. დღეს დილით ეს ინფორმაცია უზბეკეთის მთავრობამაც დაადასტურა და განაცხადა, რომ პრეზიდენტის ჯანმრთელობის მდგომარეობა კრიტიკულია.
ცნობილი ხდება ისიც, რომ 3 სექტემბერს კარიმოვის მშობლიურ ქალაქ სამარყანდის აეროპორტს დახურავენ. ადგილობრივი წყაროებით, ქალაქის დასუფთავება დაჩქარებელი ტემპით მიმდინარეობს, რაც სავარაუდოდ იმის მანიშნებელი უნდა იყოს, რომ კარიმოვი ან უკვე აღესრულა ან სიკვდილის პირასაა.
„ასოშიეიდედ პრესის“ ინფორმაციით კი, რომელიც სააგენტომ ყირგიზული და ავღანური წყაროებით მოიპოვა, კარიმოვს შაბათს დაკრძალავენ და სამგლოვიარო პროცესს ავღანეთის პრეზიდენტი აშრაფ განიც დაესწრება. ამავე წყაროს თანახმად, ტაშკენტიდან მიწვევა ყირგიზეთის პრემიერ-მინისტრმაც მიიღო. „მოსკოვსკი კომსომოლეცის“ ინფორმაციით, უზბეკეთში ჩასვლას გეგმავს ყაზახეთის ლიდერი ნულსულთან ნაზარბაევიც.
ერთადერთი, ვინც უზბეკეთის ლიდერის გარდაცვალების გამო დამწუხრებას ჯერჯერობით არ ჩქარობს, რუსეთია. კრემლის პრეს-მდივნის, დიმიტრი პესკოვის თქმით, ერთადერთი ოფიციალური წყარო, რომელსაც მოსკოვი დაუჯერებს, უზბეკეთის მთავრობაა, რომელიც კარიმოვის გარდაცვალების შემთხვევაში ოფიციალურ განცხადებას გააკეთებს.
ურთიერთგამომრიცხავი ინფორმაციისა და ქაოსის ფონზე ჩნდება ეჭვი, რომ უზბეკეთის პრეზიდენტის გარდაცვალების ფაქტს საგულდაგულოდ მალავენ. მით უმეტეს, იმ ქვეყნების გამოცდილებას თუ გავითვალისწინებთ, სადაც ლიდერთა მმართველობა რამდენიმე ათეული წელი გრძელდება.
მაგალითისთვის, ჩრდილოეთ კორეის ლიდერის, კიმ ჩენ ინის გარდაცვალებას 2 დღე მალავდნენ, ჰუგო ჩავესის გარდაცვალების შესახებ ვენესუელელებმა 2 თვის დაგვიანებით შეიტყვეს. რამდენიმე დღე მალავდნენ თურქმენეთის პრეზიდენტის, საფარმურათ ნიაზოვის სიკვდილსაც. მსგავსი პრაქტიკა ნაცნობი იყო საბჭოთა კავშირისთვისაც, სადაც „გამოცხადებული სიკვდილის ქრონიკა“ სულ მცირე 2-3 დღე გრძელდებოდა.
