,,მაშინ, როდესაც ალეკო ელისაშვილი ,,ნაციონალური მოძრაობის“ პროექტებს ახორციელებდა, მე უნივერსიტეტიდან გამომაგდეს“, - ასე პასუხობს ,,ქართული ოცნების“ აღმასრულებელი მდივანი საკრებულოს დეპუტატის მიერ დღეს გაკეთებულ მოწოდებას, რომ ირაკლი კობახიძემ უნდა თქვას, რას აკეთებდა 2012 წლამდე.
„2010 წელს მე ვიყავი ერთადერთი პროფესორი თბილისის სახელმწიფო უნივერსიტეტში, რომელმაც გააპროტესტა ის საკონსტიტუციო ცვლილებები, რომელიც შეიტანა ,,ნაციონალურმა მოძრაობამ“ საქართველოს კონსტიტუციაში. ამის გამო მე დავისაჯე კიდეც და მაშინ, როდესაც ალეკო ელისაშვილი ახორციელებდა ციონალების პროექტებს, მე გამომაგდეს თბილისის სახელმწიფო უნივერსიტეტიდან,“ - განაცხადა კობახიძემ.
მისივე თქმით, ,,ქართული ოცნების“ დაარსების დღიდან კი აქტიურად იყო ჩართული პარტიის საქმიანობაში და მაქსიმუმს აკეთებდა იმისთვის, რომ ხელისუფლებას ჩამოშორებოდა ,,ნაციონალური მოძრაობა“.
„დღეს რაც ხდება სატელევიზიო სივრცეში, იგივე ნატა ფერაძის, ალეკო ელისაშვილის სახით, არის ერთ-ერთ მკაფიო გამოხატულება იმისა, რომ ჩვენ ვართ პოლიტიკური და სამოქალაქო კულტურის განვითარების ძალიან დაბალ დონეზე, თუმცა ვითარება ძალიან მალე შეიცვლება და ძალიან მალე აღიკვეთება ჩვენს სატელევიზიო სივრცეში ბილწსიტყვაობა და სიძულვილის ენა,“-აღნიშნა კობახიძემ.
თბილისის საკრებულოს დეპუტატმა ალეკო ელისაშვილმა, ,,ქართული ოცნება-დემოკრატიული საქართველოს“ აღმასრულებელი მდივნის, ირაკლი კობახიძისგან ბოდიშის მოხდა მოითხოვა.
დღეს გამართულ პრესკონფერენციაზე ელისაშვილი კობახიძის იმ განცხადებას გამოეხმაურა, რომლის თანახმადაც, მას არ ახსოვს გიგი უგულავას მერობის დროს, 2012 წლამდე, ალეკო ელისაშვილს დედაქალაქში არსებული პრობლემები გაეპროტესტებინა.
საჯაროდ ბოდიშის მოხდის გარდა, ელისაშვილი მოითხოვს ირაკლი კობახიძემ მოუყვეს საზოგადოებას, თუ რას აკეთებდა თავად 2012 წლამდე.
„მოვითხოვ ამ ყმაწვილმა მომიხადოს საჯაროდ ბოდიში მე და ჩემს თანამოაზრეებს, რომლებიც ვიბრძოდით წლები. მეორე მოთხოვნაა, დაჯდეს და მოყვეს რას აკეთებდა 2012 წლამდე, ეს თმა გაპუწული გოგლი-მოგლი ბიჭი. თუ ამ ბიჭს არ ეყოფა გამბედაობა, ,,ოცნების“ სხვა ლიდერებმა მოიხადონ ბოდიში,“ - აცხადებს ელისაშვილი.
