საქართველოს თავდაცვის ყოფილი მინისტრი, თინა ხიდაშელი იმედოვნებს, რომ სავალდებულო სამხედრო გაწვევა მთლიანად, ყველა სტრუქტურაში გაუქმდება.
მისი თქმით, სავალდებულო გაწვევის გაუქმებას თავდაცვის სამინისტროში ბევრი მიზეზი აქვს, მაგრამ მთავარი მიზეზი ის არის, რომ არ შეიძლება ქვეყანაში გყავდეს უფასო მუშა ხელი.
,,არ შეიძლება 18-19 წლის ახალგაზრდებს ვიყენებდეთ მონური შრომისთვის. ეს ძალიან პრინციპული გადაწყვეტილება იყო და თავდაცვის სამინისტროს ამ გადაწყვეტილების გარეშე ვერ დავტოვებდით. არგუმენტები ძალიან ბევრია, რომ 21-ე საუკუნეში ახალგაზრდები არ გამოიყენონ უფასო მუშა-ხელად, ხოლო არგუმენტები იმის სასარგებლოდ, თუ რატომ უნდა გყავდეს ასეთი წვევამდელები ჯარში, არ არსებობს“, - განაცხადა ხიდაშელმა.
მისივე თქმით, იმედი აქვს, რომ არა თუ თავდაცვის სამინისტროში არ გადაიხედება არამედ, ყველა სტრუქტურაში გაუქმდება სავალდებულო გაწვევა.
,,იმედია ქვეყანა მიიღებს ამ ძალიან მნიშვნელოვან, მარტივად მისაღებ გადაწყვეტილებას, რომელსაც სჭირდება პატარა გამბედაობა და უარს იტყვის სავალდებულო გაწვევაზე ყველა სტრუქტურაში. ჩემი აქტი ეხება მხოლოდ თავდაცვის სამინისტროს. ასეთი გადაწყვეტილებები სწრაფად უნდა მიიღონ სხვა უწყებებში“, - აღნიშნა თავდაცვის ყოფილმა მინისტრმა.
