უაღრესად საგანგაშო პროცესი მიმდინარეობს, ხელისუფლება ანადგურებს საკონსტიტუციო სასამართლოს, როგორც ინსტიტუტს, რომელმაც მთელ რიგ შემთხვევებში დამოუკიდებლობა გამოამჟღავნა. ამის შესახებ ილია ჭავჭავაძის საზოგადოების თავმჯდომარემ თამარ ჩხეიძემ განაცხადა.
„უკვე აშკარაა, რომ ხელისუფლებამ საკმაო წარმატებებს მიაღწია მოსამართლეთა დიდი ნაწილის, როგორც თვითონ ხელისუფალნი ამას უტიფრად უწოდებენ, "განთავისუფლებაში!" ანუ დაშინება - დაშანტაჟებაში! ამ ვაკხანალიას საინტერესო შტრიხი შეემატა:_ბესელიამ და ვოლსკიმ საზეიმოდ განაცხადეს, რომ ის რასაც აქამდე საკონსტიტუციო სასამართლო ანხორციელებდა „ნაციონალების“ მიერ საკონსტიტუციო სასამართლოსთან გარიგების გზით მომხდარი სახელმწიფოს საწინააღმდეგო შეთქმულება იყო და უნდა იქნეს გამოძიებული“, - აცხადებს ჩხეიძე და დასძენს, - „ ცხადია, ეს იურიდიულად,პოლიტიკურად და ყოველნაირად, ნონსენსია, როგორც ეს კიდეც განაცხადა ისეთმა წესიერმა და ღირსეულმა იურისტმა, როგორიც შავგულიძეა“
მიევე თქმით, ბესელიას და ვოლსკის განცხადების მიზანია კიდევ უფრო დაზაფრონ საკონსტიტუციო სასამართლოს მოსამართლეები.
„ აქ მთავარია ამ განცხადებით კიდევ უფრო დაზაფრონ საკონსტიტუციო სასამართლოს მოსამართლეები. ეს იყო მუქარა, რომ თუ დამორჩილების გზას გადაუხვევენ, აი რა საშიში ბრალდება ემუქრებათ. მოკლედ, ძალიან ცუდი პროცესი მიმდინარეობს, რადგან აღმასრულებელი ხელისუფლებისაგან დამოუკიდებელი (ჩვენს შემთხვევაში, უფრო სწორია თუ ვიტყვით,ერთი კონკრეტული მოქალაქისგან დამოუკიდებელი) ინსტიტუტების არსებობას, რასაკვირველია, გადამწყვეტი მნიშვნელობა აქვს ქვეყნისთვის“, - აცხადებს ჩხეიძე.
