”რესპუბლიკური პარტიის” წევრ თამარ კორძაიას შეფასებით, სუს-ი ქვეყანაში საკუთარ გავლენებს აძლიერებს, რასაც ლევან იზორიას დანიშნვაც მოწმობს. დღეს გამართულ პრესკონფერენციაზე კორძაია მმართველი გუნდის წარმომადგენლების განცხადებებს გამოეხმაურა, რომლის თანახმადაც, თინა ხიდაშელი მის შემცვლელზე განაწყენებულის პოზიციიდან საუბრობდა.
,,თინა ხიდაშელი ყველა მის კომენტარში არის ქართული ჯარის გულშემატკივარი. სწორედაც, რომ სუს-ის ხელმძღვანელის მოადგილის ჯარში გადაყვანა, ნიშნავს, რომ ქვეყანაში არსებული უსაფრთხოების სამსახურის პოლიტიკა გრძელდება. სუს-ი აძლიერებს ქვეყანაში საკუთარ გავლენებს და ამ პოლიტიკის დადასტურებაა ლევან იზორიას თავდაცვის მინისტრად დანიშვნა მაშინ, როდესაც მთელი ამ ხნის განმავლობაში, თავდაცვის სამინისტროს სამოქალაქო პირი მართავდა ”, - განაცხადა კორძაიამ.
მისივე თქმით, მიმდინარე საკადრო ცვლილებები, როდესაც ყველგან - მერიაში, თავდაცვის სამინისტროში, უსაფრთხოების სამსახურის კადრები ინიშნებიან, კონტექსტი ძალიან მნიშვნელოვანია.
”ეს არის ”ოდეერის” ინსტიტუტის საჯაროდ და ღიად გაგრძელება, რასაც ჩვენ ვებრძოდით და ვებრძვით. აქედან გამომდინარე, შეფასება, რომ გაბრაზებულზე ვლაპარაკობთ, უსამართლოა. ”ოდეერებთან”, მოსმენებთან დაკავშირებით ვიყავით გაბრაზებულები და ყოველთვის ვიქნებით”, - განაცხადა კორძაიამ.
