პოლკოვნიკი ტრისტან წითელაშვილი ირწმუნება, რომ გასაიდუმლოებულ ობიექტზე არ ყოფილა და ის მზადაა გამოძიებასთან ითანამშრომლოს. პრესკონფერენციაზე მან თინა ხიდაშელი ,,ნაციონალურ მოძრაობასთან“ გარიგებაში დაადანაშაულა.
ტრისტან წითელაშვილი ირწმუნება, რომ ხიდაშელმა გოდერძი ორმოცაძე სამსახურიდან მასთან მტრული დამოკიდებულების გამო გაათავისუფლა.
,,საიდუმლო ობიექტებზე არ ვყოფილვარ და შესაბამისად, არც გადაღება და არც ჩაწერა არ მიწარმოებია. მე ვიყავი თელეთის მთაზე, სადაც გენერალური შტაბის უფროსობის დროს გიგი კალანდაძეს გადაყვანილი ჰყავდა მოპარული ტექნიკა. მზად ვარ ვითანამშრომლო პროკურატურასთან და მივაწოდო ის ინფორმაცია, რომელიც დაკავშირებულია მოპარულ თანხებთან, რომელიც მოიპარა სააკაშვილმა, კეზერაშვილმა, ახალაიამ, კალანდაძემ და ა.შ. მე ჩავაყენე საქმის კურსში გენერალური ინსპექციის უფროსი ბატონი ხორბალაძე. ბუნებრივია, გენერალური ინსპექციის მეშვეობით მინდია ჯანელიძე საქმის კურსში იყო და მინდია ჯანელიძემაც დაიწყო ამ საქმეების ირგვლივ მასშტაბური მუშაობა და გამოძიება. ხიდაშელს ვადანაშაულებ გარიგებაში ნაციონალურ მოძრაობასთან, ამიტომ იყო რომ პირდაპირ უთხრა გოდერძი ორმოცაძეს, შენ ხარ მეგობარი პირადად ჩემი მტრისო, ამიტომ შენ სამსახურში არ უნდა იყოო,“- განაცხადა ტრისტან წითელაშვილმა.
შეგახსენებთ, რომ გიგი კალანდაძის მიერ გავრცელებული ინფორმაციით, გოდერძი ორმოცაძის სამსახურეობრივი საშვით ხვდებოდა ტრისტან წითელაშვილი საიდუმლო ობიექტებზე და აწარმოებდა გადაღებას, მასალები კი უცხო ქვეყნის სპეცსამასახურების ხელში ხვდებოდა.
