„ნაციონალური მოძრაობის“ წევრი, ვაკის რაიონის მაჟორიტარი დეპუტატი ელენე ხოშტარია „პოსტ სკრიპტუმის“ მიერ გავრცელებულ ინფორმაციას გამოეხმაურა და განაცხადა, რომ უნდა დადგეს იმ ადამიანების სისხლისამართლებრივი და პოლიტიკური პასუხისმგებლობის საკითხი, ვინც უზრუნველყოფს და ახდენს ჩვენი ქვეყნის საიდუმლოებების გამჟღავნებას.
გაერთიანებული შტაბის ყოფილი უფროსის, გენერალ გიგი კალანდაძის მტკიცებით, აგვისტოს ომის შემდეგ საქართველოს ტერიტორიაზე აშენებული საიდუმლო სამხედრო ობიექტების კოორდინატები და მთელი ინფორმაცია, მინდია ჯანელიძის მინისტრობის დროს, სხვა ქვეყნის სპეცსამსახურების ხელში აღმოჩნდა.
,,პოსტსკრიპტუმთან” ინტერვიუში მან განაცხადა, რომ პოლკოვნიკი ტრისტან წითელაშვილი საცეცხლე წერტილებზე მინდია ჯანელიძის მინისტრობის დროს დანიშნულმა, გენინსპექციის თანამშრომელმა გოდერძი ორმოცაძემ შეიყვანა, რომელმაც საიდუმლო ბაზაზე შესვლა სამსახურეობრივი საშვით შეძლო.
ელენე ხოშტარიას თქმით, ამ ყველაფრით ძალიან სერიოზული დარტყმა მიადგა ჩვენი ქვეყნის თავდაცვისუნარიანობას და უსაფრთხოების სისტემას.
,,თუ ჩვენი ქვეყნის უსაფრთხოების სისტემა ასე მუშაობს, მაშინ შეიძლება ძალიან ბევრი ფაქტი არსებობდეს, რაც სერიოზულად აზიანებს ქვეყნის თავდაცვისუნარიანობას და ეს საზოგადოებამ არ იცის. ნორმალურ ქვეყანაში ასეთ შემთხვევაში უნდა დადგეს იმ ადამიანების სისხლისსამართლებრივი და პოლიტიკური პასუხისმგებლობის საკითხი, ვინც უზრუნველყოფს და ახდენს ჩვენი ქვეყნის საიდუმლოების გამჟღავნებას. ეს ყველაფერი იმის დამსახურებაა, რომ მთელი სახელმწიფო მანქანა ამ ოთხი წლის განმავლობაში არის ორიენტირებული არა დაზვერვით საქმიანობაზე და საფრთხეების ნეიტრალიზაციაზე, არამედ ოპოზიციის დევნასა და ვიწრო პარტიული მიზნების შესრულებაზე. გამოსავალი იქნება ამ არასწორი, დამახინჯებული სისტემის შეცვლა არჩევნებში ჩვენი გამარჯვების გზით“, - განაცხადა ელენე ხოშტარიამ.
,,პოსტსკრიპტუმის” ინფორმაციით, საიდუმლო ობიექტები წითელაშვილმა ფირზე გადაიღო. გადაღების დროს წითელაშვილს ხელი სამხედროებმა შეუშალეს, თუმცა უშედეგოდ. სამხედროებმა კალანდაძის ინფორმაცით, მიაწოდეს ინფორმაცია ზემდგომებს, თუმცა მინისტრმა საბოლოოდ აღნიშნულის გამოძიება არ დაიწყო, რის გამოც კალანდაძე ჯანელიძეს რუსულ სპეცსამსახურებთან თანამშრომლობაში სდებს ბრალს.
წითელაშვილი, 2008 წლის აგვისტოს ომის შემდეგ დააკავეს და სამშობლოს ღალატისთვის პატიმრობა მიუსაჯეს. 2013 წლის იანვარში, ხელისუფლებაში ქართული ოცნების მოსვლის შემდეგ მან ციხე დატოვა.
