ევროსაბჭოს მიერ მოთხოვნილი კრიტერიუმია მოსამართლეობის კანდიდატის მიერ სასამართლო სისტემაში მუშაობის გამოცდილება და სტაჟის ქონა, - ამის შესახებ პარლამენტის ადამიანის უფლებათა კომიტეტის თავმჯდომარემ ეკა ბესელიამ სტრასბურგის სასამართლოში ევა გოცირიძის კანდიდატურის წარდგენასთან დაკავშირებით განაცხადა.
,,არავინ ამბობს, რომ ანა დოლიძე კარგი და კვალიფიციური იურისტი და ადამიანის უფლებათა კარგი დამცველი არ არის, მაგრამ ევა გოცირიძე ევროპული სასამართლოს მოსამართლეობის კანდიდატად, დადგენილი კრიტერიუმების გათვალისწინებით შეირჩა“,- აღნიშნა ბესელიამ.
დეპუტატის თქმით, არავითარ პროცედურულ დარღვევას ადგილი არ ჰქონია. მისივე განცხადებით, კანდიდატების წარდგენა აპრიორი იმას არ ნიშნავს, რომ რომელიმე გარანტირებულად გამარჯვებული იქნება.
“გადაწყვეტილების მიღება ძალიან რთული პროცედურით ხდება. ევროპის საბჭოს საპარლამენტო ასამბლეა მოსამართლეს ფარული კენჭისყრით ირჩევს. იმის მიუხედავად, თუ ვის ვინ მოსწონს, გადაწყვეტილებას იღებენ ევროსაბჭოს საპარლამენტო ასამბლეის დეპუტატები, ფარული კენჭისყრით. ამას წინ უძღვის კიდევ ერთი პროცედურა - ეს არის კომიტეტის სარეკომენდაციო წერილი“, - აღნიშნა ბესელიამ.
სტრასბურგის სასამართლოში საქართველოდან ასარჩევი მოსამართლეობის კანდიდატთა სამპირიან სიაში ნანა მჭედლიძეს ევა გოცირიძე ჩაანაცვლებს.
