აშშ-ს ეროვნულ-დემოკრატიული ინსტიტუტის საქართველოს ოფისის დირექტორი ლორა ტორნტონი მიიჩნევს, რომ არჩევნების შედეგები იმ გადაუწყვეტელ ამომრჩეველზე იქნება დამოკიდებული, რომელთა პროცენტული მაჩვენებელი საკმაოდ მაღალია.
„ეს არის ჩვენი ბოლო კვლევა არჩევნებამდე, რომლის მიხედვითაც შეგვიძლია ვთქვათ, რომ მოსახლეობაში არჩევნებზე მისვლის და ხმის მიცემის სურვილი დიდია, თუმცა კვლავაც არ იცის უმრავლესობამ ვის მისცემს ხმას. 67% ამბობს, რომ წავა არჩევნებზე, 47%-ის არჩევანი გადაუწყვეტელია. რაც შეეხება პარტიების ინდივიდუალურ რეიტინგებს, იმდენად დაბალია ეს ციფრები, რომ შეუძლებელია მათი საშუალებით ვცადოთ წინასწარმეტყველება, რა შედეგი დადგება არჩევნებზე. ოქტომბრის შედეგები მთლიანად იქნება დამოკიდებული იმ ხალხზე, ვინც მიდის არჩევნებზე, მაგრამ არ იცის ვის მისცემს ხმას. შესაბამისად ვფიქრობ ეს მონაცემები გამოსაფხიზლებელი იქნება პარტიებისთვის, რომლებსაც ორი თვე დარჩათ," - განაცხადა ლორა ტორნტონმა.
მისივე თქმით, იმ ამომრჩევლების გამოკითხვის მიხედვით, რომლებსაც არჩევანი უკვე გაკეთებული აქვთ, ძირითადად ოთხი პარტია ფიგურირებს. ყველაზე მაღალი მაჩვენებელი ქართულ ოცნებას აქვს, მეორე ადგილზეა ნაციონალური მოძრაობა, მესამე -მეოთხე ადგილებს კი პაატა ბურჭულაძის პარტია და პატრიოტთა ალიანსი ინაწილებენ.
