გერმანიის ქალაქ ანსბახში მოხდარ აფეთქებაზე პასუხისმგებლობა ტერორისტულმა დაჯგუფებამ “ისლამურმა სახელმწიფომ” აიღო.
სააგენტო Amaq-ის ინფორმაციით, თვითმკვლელი სირიელი, რომელმაც ანსბახში თავი აიფეთქა, “ისლამური სახელმწიფოს ერთ-ერთი “ჯარისკაცი” იყო.
ბავარიის მიწის შინაგან საქმეთა მინისტრმა მომხდარს ტერაქტის კვალიფიკაცია მისცა. მინისტრის ინფორმაციით, თავდამსხმელის მობილურ ტელეფონში აღმოჩენილია ვიდეოჩანაწერი, რომელშიც ის ექსტრემისტული დაჯგუფების "ისლამური სახელმწიფოს" ლიდერის, აბუ ბაქრ ალ-ბაღდადის ერთგულების ფიცს დებს.
ვიდეომიმართვა არაბულ ენაზეა ჩაწერილი.
27 წლის სირიელმა მიგრანტმა ქალაქ ანსბახში კაფე-ბარის შესასვლელთან აიფეთქა თავი, რის შედეგადაც 12 ადამიანი დაშავდა.
პოლიციის განცხადებით, ის მუსიკალურ ფესტივალზე ცდილობდა შეღწევას, თუმცა დაცვამ არ შეუშვა.
