საქართველოს პრემიერ-მინისტრი მიიჩნევს, რომ გიორგი პაპუაშვილის მხრიდან ადგილი აქვს ინსტიტუციების დისკრედიტაციას. გიორგი კვირიკაშვილმა ამის შესახებ საკონსტიტუციო სასამართლოს თავმჯდომარის განცხადების შეფასებისას ისაუბრა, რომლის თანახმადაც ის არ აპირებს აჭარის პროკურატურაში მივიდეს.
,,სამწუხაროდ, მან გადაწყვიტა, რომ პროკურატურისთვის არ მიემართა და ჩემთვის გაუგებარია, რატომ შეიძლება, რომ აჭარის პროკურატურაში მისვლა იყოს არაადეკვატური. მე მგონია, რომ ჩვენ ჩვენს ინსტიტუციებს, მათ შორის ნებისმიერ ფილიალს, მეტი პატივი უნდა ვცეთ. მე მასთან შეხვედრის პრობლემა არ მაქვს, მაგრამ მგონია, რომ საქმე გვაქვს ინსტიტუციების დისკრედიტაციასთან, რაც ყოვლად დაუშვებელია, რადგან ეს ინსტიტუციები ყველას გვჭირდება და ეს ის ინსტიტუციებია, რაზეც ქვეყანა დგას. მე ვესაუბრე მთავარ პროკურორს ამ თემაზე, ვესაუბრე გიორგი პაპუაშვილსაც, ჩემი მოწოდება იქნება და დიდი იმედი მაქვს, რომ ისინი შეხვდებიან და გაირკვევა სიმართლე”, - განაცხადა გიორგი კვირიკაშვილმა.
გიორგი პაპუაშვილი მოსამართლეებზე მიზანმიმართულ ზეწოლაზე საუბრობს, თუმცა კონკრეტულ ფაქტებზე საუბრისგან თავს იკავებს. პრეზიდენტმა პაპუაშვილთან შეხვედრის შემდეგ დღეს განაცხადა, რომ საკონსტიტუციოს თავმჯდომარემ მას კონკრეტული ფაქტები მიაწოდა.
