საქართველოს პარლამენტის ვიცე-სპიკერი მანანა კობახიძე მიიჩნევს, რომ საქართველოს პრეზიდენტის დღევანდელი განცხადება არასერიოზულ შთაბეჭდილებას ტოვებს. მისი თქმით, პრეზიდენტი მეტი პასუხისმგებლობით უნდა ეკიდებოდეს განცხადებებს.
„ჩემი აზრით, ეს არ იყო პასუხისმგებლობით გაკეთებული განცხადება. მე მგონი, რომ ამას პოლიტიკური მიზანი აქვს, ის ყოველთვის ისვრის გარკვეულ ბრალდებებს ხელისუფლების მიმართ, თუმცა შედმეგ არ ხდება დაკონკრეტება. როდესაც მედიას ეძახი, რაიმე რეალური ფაქტი უნდა გადასცე და არა - ზოგადი ინფორმაცია. ეს არის არასერიოზული განცხადება პრეზიდენტის მხრიდან. ან რატომ საუბრობს ახლა, თუ საუბარია, რომ შემთხვევა ერთი თვის წინ მოხდა. ფაქტია, რომ რაღაც პოლიტიკური მიზნები აქვს. ეტყობა, პრეზიდენტს სურს, ასეთი განცხადებებით რაღაც ქარიშხალი შექმნას“,-აღნიშნა პარლამენტის ვიცე-სპიკერმა.
მისი თქმით, იქნება ეს პრეზიდენტი, საკონსტიტუციო სასამართლოს თავმჯდომარე, თუ მოსამართლე, მტკიცებულება და სამხილი უნდა გადასცენ იმ ორგანოს, ვისაც ევალება დანაშაულის გამოძიება. ეს არის პროკურატურა“,-აღნიშნა კობახიძემ.
საქართველოს პრეზიდენტ გიორგი მარგვლაშვილის განცხადებით, მისი ოჯახის წევრზე სამართალდამცველების ჩართვით ზეწოლის მცდელობა იყო. პრეზიდენტმა ამის შესახებ განცხადება დღეს, საკონსტიტუციო სასამართლოს თავმჯდომარესთან შეხვედრის შემდეგ გააკეთა.
