ხათუნა ლაგაზიძე პრეზიდენტის განცხადებაზე სამართალდამცველებს გამოძიების დაწყებას სთხოვს. პაატა ბურჭულაძის პარტიის "სახელმწიფო ხალხისათვის" ერთ-ერთმა ლიდერმა საერთაშორისო ორგანიზაციებს სწრაფი რეაგირებისაკენ მოუწოდა.
"ის რაც პრეზიდენტმა განაცხადა რომ სამართალდამცველების მხრიდან მისი ოჯახის წევრზე ზეწოლას ჰქონდა ადგილი, გამაოგნებელია. ეს ნიშნავს, რომ სახელმწიფო არ არსებობს. 2016 წლის არჩევნების ლეგიტიმაციაც კითხვის ნიშნის ქვეშ დგება. ყველაზე მაღალი ლეგიტიმაციის მქონე პირი თუ არ არის დაცული ქვეყანაში, ჩვეულებრივი მოქალაქის ნება საფრთხეშია",-განაცხადა ლაგაზიძემ, რომელიც თბილისის საქალაქო სასამართლოში თანაპარტიელების პროცესზე იმყოფებოდა.
საქართველოს პრეზიდენტ გიორგი მარგვლაშვილის განცხადებით, მისი ოჯახის წევრზე სამართალდამცველების ჩართვით ზეწოლის მცდელობა იყო. პრეზიდენტმა ამის შესახებ განცხადება საკონსტიტუციო სასამართლოს თავმჯდომარესთან შეხვედრის შემდეგ გააკეთა.
,,სამწუხაროდ, მე ამ ფაქტებმა არ გამაოცა. ეს ტენდენცია სამწუხაროდ, ახალი არ არის. დახლოებით, ერთი თვის წინ, ჩემი ოჯახის წევრზეც იყო მცდელობა, გარკვეული სამართალდამცავების ჩართვით, ზეწოლისა.
ოჯახის წევრი გააჩერეს ქუჩაში და შემდეგ მის სახლში ჩაატარეს ჩხრეკა ყოველგვარი სასამართლოს დადგენის გარეშე, იმედით, რომ ამას რაღაც მოყვებოდა.
ბუნებრივია, სუფთა იყო ყველაფერი, არანაირი სამართალდარღვევა არ იყო, მაგრამ იქ იყო გარკვეული მინიშნებები, რომ ეს არის სწორედ ამ პიროვნებაზე ზეწოლის მცდელობა. ეს იყო იმიტაცია რეალურად. აქედან გამომდინარე, რაც მითხრა პაპუაშვილმა, ჩემთვის გასაოცარი არ არის.
ჩემთვის ასეთი ტიპის ზეწოლა სასაცილოა. სააკაშვილის პერიოდი მაქვს გამოვლილი და ბუნებრივია, არანაირად ეს მე არ შემეხებოდა. საუბარია სამართალდამცავებისა და პოლიტიკოსების ერთობლივ მოქმედებებზე“, - განაცხადა მარგველაშვილმა.
