საკონსტიტუციო სასამართლოს თავმჯდომარე გიორგი პაპუაშვილი პროკურატურაში მისვლას არ აპირებს, თუმცა მზადაა შეხვდეს პრემიერ-მინისტრს და აუცილებლობის შემთხვევაში მთავარ პროკურორს.
როგორც პაპუაშვილმა პრეზიდენტთან შეხვედრის შემდეგ ჟურნალისტებს განუცხადა, მას მოსამართლეებზე ზეწოლის შესახებ მის მიერ გაჟღერებულ ინფორმაციასთან დაკავშირებით უწყებაში მისვლის შესახებ შეტყობინება ბათუმის პროკურატურისგან მიუვიდა.
„მე არსად მისვლას არ ვაპირებ. თუ ვნახე რომ მზადყოფნა იქნება, შევხდები მთავარ პროკურორს და მივაწვდი ინფორმაციას“, - განაცხადა პაპუაშვილმა.
მისი თქმით, ის პრემიერ-მინისტრთან შეხვედრასაც გეგმავს, რასთან დაკავშირებით დაპირება თავად გიორგი კვირიკაშვილისგან მიიღო.
„მაშინ, როდესაც ვისაუბრე ამ ფაქტების შესახებ, გამოვთქვი სურვილი და მზადყოფნა ქვეყნის პოლიტიკურ ხელმძღვანელობასთან შეხვედრის, მათ შორის პრეზიდენტთან. მადლობელი ვარ, რომ მან გამონახა საშუალება შეხვედრის, ასევე სატელეფონო საუბარი მქონდა პრემიერ-მინისტრთან და ვთხოვე, რომ მზად ვიყავი შეხვედრისთვის. ის დამპირდა, რომ როგორც კი მოიცლიდა, დამიკავშირდებოდა“, - განაცხადა პაპუაშვილმა.
საკონსტიტუციო სასამართლოს თავმჯდომარემ მედიასთან საუბრისას კვლავ თავი შეიკავა მოსამართლეებზე ზეწოლის კონკრეტულ ფაქტებზე, ასევე მის განმახორციელებლებსა და ადრესატებზე საუბრისგან.
