ჩინეთის ჩრდილოეთ და ცენრალურ რაიონებში წყალდიდობის შედეგად 150-ზე მეტი ადამიანი დაიღუპა. ათობით ადამიანი კი უგზო უკვლოდ დაკარგულად ითვლება. სტიქიის გამო ასი ათასობით ადგილობრივი მცხოვრები იძულებული გახდა, სახლი მიეტოვებინა.
ყველაზე მეტად წყალდიდობამ და მეწყერმა ხებეისა და ჰენანის პროვინციები დააზარალა.
ხებეიში დაღუპულია 114 ადამიანი, 111 კი დაკარგულად ითვლება. სტიქიამ პროვინციაში 53 ათასზე მეტი სახლი გაანადგურა.
ქალაქ სინტაში, სადაც წყალიდიდობას 25 ადამიანი ემსხვერპლა, ადგილობრივმა მცხოვრებლებმა დემონსტრაცია გამართეს. ისინი ხელისუფლებას იმაში ადანაშაულებენ, რომ მოსალოდნელი სტიქიური უბედურების შესახებ არ გააფრთხილა. ათასობით ადამიანმა ქალაქის ცენტრალური გზა გადაკეტა, თუმცა ისინი პოლიციამ დაშალა.
წყალდიდობის შედეგად დაზარალებულ ყველა რაიონში შეზღუდულია ელექტროენერგიის მიწოდება და ტრანსპორტის მუშაობა.
