თინა ხიდაშელის განცხადებით, საქართველოს მთავარი ამოცანაა, შავი ზღვის ახალი უსაფრთხოების ფორმატში იყოს ჩართული. საქართველოს თავდაცვის მინისტრი ვარშავაში, ნატოს სამიტზე იმყოფება.
თინა ხიდაშელის თქმით, ქართულ მხარეს აქვს იმედი, რომ ნატოს ვარშავის სამიტზე პოლიტიკური გადაწყვეტილება იქნება მიღებული და საქართველოს მიიწვევენ ამ სტრატეგიული დიალოგის ფორმატში.
„ერთ-ერთი ყველაზე მთავარი და მნიშვნელოვანი ამოცანა, რომელსაც კონკრეტულად თავდაცვის სამინისტრო ამ მთელ მოლაპარაკებების პროცესში მიზნად ისახავდა, იყო შავი ზღვის უსაფრთხოების ფორმატი. ჩვენ გვაქვს მოლოდინი, რომ პოლიტიკური გადაწყვეტილების მიღების კვალობაზე საქართველოს მიიწვევენ ამ სტრატეგიული დიალოგის ფორმატში. ჩვენ ძალიან აქტიურად ვმუშაობთ ჰაერსაწინააღმდეგო მიმართულებაზე, ეს ერთ-ერთი პრიორიტეტია ქართული სახელმწიფოსთვის, ფრანგული კონტრაქტები ამის მთავარი გამოვლინება იყო. თუმცა, ეს არ არის საკმარისი და ჩვენ ვითხოვდით საქართველო სწორედ ჰაერსაწინააღმდეგო კუთხითაც ყოფილიყო ჩართული ამ პროცესში,“- განაცხადა თინა ხიდაშელმა.
