ამერიკის შეერთებული შტატების სახელმწიფო მდივანთან საპარლამენტო ოპოზიციის შეხვედრის დასრულების შემდეგ ”ნაციონალური მოძრაობის” ერთ-ერთმა ლიდერმა გიგა ბოკერიამ განაცხადა, რომ ჯონ კერის მიერ გაჟღერებული გზავნილები არის პირველ რიგში ხელისუფლებისთვის, მისი შეფასებით, გზავნილები იყო ძალიან მკაფიო.
,,მან ძალიან მკაფიო გზავნილი გააჟღერა ორივე მიმართულებებით ჩვენი ქვეყნისთვის - ეს იყო გზავნილი მთელი საქართველოსთვის და რა თქმა უნდა, პირველ რიგში, ხელისუფლებისთვის. ეს არის მხარდაჭერა ჩვენი სახელმწიფობრიობისა და დამოუკიდებლობისა იმ გამოწვევის ფონზე, რასაც ჩვენი ჩრდილოელი მეზობელი გვიქმნის. ეს არის მკაფიო მხარდაჭერა ჩვენი დემოკრატიის და მკაფიო გზავნილი ივანიშვილის ხელისუფლებისთვის, რომ ეს ორივე საკითხი არის ურთიერთდაკავშირებული და ეს გვესმის ჩვენ ყველას და ესმის ქართველ ხალხს”, - განაცხადა ბოკერიამ.
მისი განმარტებით, შეხვედრაზე საუბარი შეეხო მოახლოებული არჩევნების საკითხს დამედიის თავისუფლების უზრუნველყოფის აუცილებლობას.
”შეხვედრაზეც ითქვა იგივე, რაც ითქვა საჯაროდ, რომ ეს არჩევნები არის ტექსტი დემოკრატიისა და რომ, ის რაც ხდება მედიაში და კერძოდ, ამ შემთხვევაში, ”რუსთავი 2”-ში, არის ფუნდამენტი იმისა, იქნება თუ არა ეს არჩევნები დემოკრატიული. ეს სახელმწიფო მდივნის ან შეერთებული შტატების თავს მოხვეული პოზიცია კი არ არის, ეს არის ქართველი ხალხის არჩევანი, რომელსაც შეერთებული შტატები უჭერს მხარს. ჩვენი ხალხის არჩევანია, რომ ჩვენი ქვეყანა იყოს დასავლური დემოკრატია, თავისუფალი, სადაც ეკონომიკა მიდის წინ, ადამიანები ირჩევენ მთავრობას და აქვთ საშუალება, რომ საჯაროდ გამოხატონ აზრი თავისუფალი მედიის მეშვეობით და ამ შემთხვევაში ”რუსთავი 2” არის საკვანძო საკითხი”, - აღნიშნა ბოკერიამ.
