საქართველოს პარლამენტის თავმჯდომარე მიიჩნევს, რომ ლაფანყურის სპეცოპერაციის დეტალებს ნათელი უნდა მოეფინოს და მიიღოს ქვეყანამ შესაბამისი ზარალი, ვიდრე დარჩეს ყველაფერი კითხვის ნიშნის ქვეშ მსოფლიოსათვის. დავით უსუფაშვილმა აჰმედ შატაევთან დაკავშირებით დასმულ კითხვაზე ასევე განაცხადა, რომ მას არ აქვს იმაზე მეტი ინფორმაცია, რაც უკვე განაცხადეს შესაბამისმა თანამდებობის პირებმა, ვისაც შეხება ჰქონდა ამ საქმესთან.
,,აქ ცოტა მგრძნობიარე თემებთან გვაქვს საქმე. თქვენ ფიქრობთ, რომ არსებობს რომელიმე ქვეყანა, რომლის სპეცსამსახურებს არ ჰყავთ აგენტურული ქსელი?! ასეთი ქვეყანა მსოფლიოში არ არსებობს. თუ არის სპეცსამსახური, მისი მუშაობისთვის ეს სრულიად ჩვეულებრივი ამბავია. როგორც თქვენ რესპონდენტი გყავთ, ასე იმ ხალხს ჰყავს სპეციალური აგენტები, რომლებსაც სადღაც რაღაცისთვის იყენებენ. ამიტომ როდესაც ხელისუფლების ცვლილება ხდება, შეიძლება აღმოჩნდეს, რომ ახალმა ხელისუფლებამ ჩათვალოს, რომ ძველი ხელისუფლება აგენტებს არასწორი მიმართულებით იყენებდა. ასეთ დროს ვინ როგორ იქცევა - აგენტებს სახლში უშვებენ, თუ ვიღაცას სჯიან, მე ამდენი ნამდვილად არ ვიცი და არც მინდა ვიცოდე, მაგ სფეროში ზედმეტი ცოდნა სახიფათოა“, - განაცხადა უსუფაშვილმა.
რაც შეეხება აჯმედ ჩატაევის გათავისუფლების საკითხს, უსუფაშვილი აცხადებს, რომ როგორც ჩანს
სისხლის სამართლის საქმის პროცესში მისი დანაშაული ვერ დადასტურდა.
,,ამას გვეუბნებიან ჩვენ სამართალდამცველი ორგანოები. თუ რაიმე იყო დაფარული თავის დროზე ლაფანყურის სპეცოპერაციის დროს, თუ შემდგომ ჩვენი ხელისუფლების დროს, სახელმწიფო ინტერესებიდან გამომდინარე, რომ ეს წინა ხელისუფლების აგენტურული ქსელის მეშვეობით იყო, თუ ახალი ხელისუფლების - საბოლოოდ საერთაშორისო არენაზე ქვეყანა აგებს ხოლმე პასუხს ასეთ თემებზე. თუ ჩვენმა რომელიმე თანამდებობის პირმა თავის დროზე ჩათვალა, რომ აქ საქმე გვქონდა რაიმე ისეთ მოვლენასთან, რომელიც შეიძლება სხვისი გაკეთებული იყო - წინა ხელისუფლების, მაგრამ მისი გამომზეურება საქართველოს ზიანს მიაყენებდა და ამიტომ შესაძლოა რაღაცეები არ ითქვა, მე მათ ვთხოვ და მივმართავ, რომ ახლა ისე წავიდა საქმე, რომ სჯობს ყველაფერი ითქვას და სიმართლე გავიგოთ, რა ხდებოდა ამ საქმეში, ვიდრე ვიყოთ რაღაც კითხვის ნიშნების ქვეშ, განსაკუთრებით მსოფლიო პრესიდან და სხვა ქვეყნებიდან“, - განაცხადა უსუფაშვილმა.
