იუსტიციის მინისტრმა ახმედ ჩატაევთან დაკავშირებით განმარტებები გააკეთა და განაცხადა, რომ ის არასდროს უჭერდა მხარს ჩატაევის გათავისუფლებას და შეკითხვები დღემდე აქვს ყოფილ ხელისუფლებასთან.
"რაც შეეხება ჩატაევს და მის მფარველ სააკაშვილს, მე ამ თემასთან დაკავშირებით ჯერ კიდევ ჩატაევის გათავისუფლებამდე მქონდა კითხვები. რაკი მქონდა კითხვები, ამიტომ მის გათავისუფლებას მივიჩნევდი ნაადრევად. თუმცა, მთავარი პროკურორის მიერ იქნა მიღებული გადაწყვეტილება, რომ იმ კონკრეტული იარაღის უკანონო ტარების საქმეში, რომელზეც მას ბრალი ედებოდა, ბრალი ყოფილიყო მოხსნილი. ასეა თუ ისე, ამ თემებზე დისკუსია კარგია, მაგრამ აუცილებელია, რომ ჩვენ არასდროს დაგვავიწყდეს, რომ როდესაც საქმე ეხება პანკისს, სახელმწიფო უსაფრთხოებას, თუნდაც სახელმწიფო საიდუმლოების და საიდუმლო აგენტების თემებს, აქ დისკუსია კარგია, მაგრამ მეტისმეტი ენაწყლიანობა ვნებს ქვეყანას, ეს უბრალოდ, რჩევა და თხოვნა მექნებოდა ყველასადმი," - აღნიშნა თეა წულუკიანმა.
იუსტიციის მინისტრი ჩატაევის და ყოფილი ხელისუფლების პირების ურთიერთობასთან დაკავშირებოთ არსებულ კითხვებზე საუბრობს და პირობას იძლევა, რომ ეს საქმე აუცილებლად იქნება გამოძიებული.
"დიახ, არსებობდა კითხვები, რადგან პრეზიდენტი, ვანო მერაბიშვილი და მისი მოადგილე ბატონი ლორთქიფანიძე მოიაზრებოდნენ, როგორც ჩატაევის ქვეყანაში შემომყვანები უკრაინიდან, იყენებდნენ მას სხვადასხვა, მათთვის საინტერესო თემებზე და როდესაც რაღაც არ მოეწონათ, ჩასვეს ციხეში და ასე ციხეში ჩასმული დაგვხვდა ჩვენ. მე რუსთავი 2-ს გპირდებით, რომ აუცილებლად იქნება ეს გამოძიება, როგორც კი სააკაშვილი აღმოჩნდება ქართველი სამართალდამცავების ხელში," - აცხადებს თეა წულუკიანი.
თურქეთში მომხდარი თავდასხმის ორგანიზატორის ვინაობას თურქეთის ხელისუფლება ამ დრომდე არ ასაჯაროებს, თუმცა მედია ისლამური სახელმწიფოს ერთ-ერთ მეთაურს აჰმედ ჩატაევს ასახელებს.
