საქართველოს პრემიერ-მინისტრი ადასტურებს სომხეთის ტრანსპორტის მინისტრის განცხადებას, რომ სომხეთი ქართულ და რუსულ მხარეებთან ”სამხრეთ ოსეთის” გავლით გზის გახსნაზე მოლაპარაკებებს აწარმოებს.
გიორგი კვირიკაშვილის განცხადებით, აბსოლუტურად გაუგებარია ის ისტერიკა, რომელიც შეიქმნა ამ საკითხის გამო.
მისი განმარტებით, დევდორაკის მეწყერის ჩამოწოლის შედეგად გზა არის განადგურებული, რითაც პრობლემა ექმნებათ, უპირველეს ყოვლისა, საქართველოს ექპორტიორებს ხილის გატანის კუთხით და ასევე, პრობლემა შეექმნათ სომხეთის წარმომადგენლებს, ბიზნესმენებს.
,,ჩვენ ვფიქრობთ, რომ საქართველოს სატრანზიტო ფუნქციის სრულად განხორციელებისთვის აუცილებელია, რომ ვიყოთ საიმედო პარტნიორი. სწორედ ამიტომ, მე მქონდა სომხეთის პრემიერ-მინისტრთან საუბარი და მათი წინადადება იყო, რომ დაელაპარაკებოდნენ რუსეთის მხარეს, რათა დროებით, მაქსიმალურად უმტკივნეულო რეჟიმში, სტატუსის შეხების გარეშე მოხდებოდა არხის გახსნა", - განაცხადა გიორგი კვირიკაშვილმა.
პრემიერის განმარტებით, კანონი ”ოკუპირებული ტერიტორიების შესახებ” ფორსმაჟორულ სიტუაციაში ითვალისწინებს ნეიტრალური სტატუსით ტვირთის გატარებას ოკუპირებულ ტერიტორიაზე.
სომხური მხარე საქართველოსთან აწარმოებს მოლაპარაკებებს, რათა სომხეთის მოქალაქეებისთვის “სამხრეთ ოსეთის” გავლით რუსეთთან მიმავალი გზა გაიხსნას, - როგორც სომხური მედია იტყობინება, ამის შესახებ სომხეთის ტრანსპორტის მინისტრმა გაგიკ ბეგლარიანმა მთავრობის სხდომაზე განაცხადა.
