,,ჩვენ რუსეთის მხარდაჭერა გვჭირდება ძალიან კონკრეტულ საკითხებში, რასაც ეუთო აყენებს”, - ამის შესახებ ენმ-ის წევრმა გიგი წერეთელმა რუსეთის მიერ ეუთო-ს საპარლამენტო ასამბლეის პრეზიდენტად მისი კანდიდატურის მხარდაჭერის შეფასებისას განაცხადა.
„რეზოლუცია, რომელიც ჩვენ შევიტანეთ საქართველოში კონფლიქტთან დაკავშირებით, გავიდა. ძალიან ბევრი მნიშვნელოვანი პუნქტია, რომელიც ჩვენ ქვეყანას სჭირდება და რუსეთს მოთხოვოს თავისი ვალდებულებების შესრულებას, დეოკუპაციასთან და დევნილების დაბრუნებასთან დაკავშირებით. ნებისმიერი დელეგაციის მხარდაჭერა არის კარგი გზავნილი. პრეზიდენტიც და ასამბლეაც უნდა შეეცადოს, რომ ეს გამოიყენოს სწორი მიმართულებით. ჩვენ რუსეთის მხარდაჭერა გვჭირდება ძალიან კონკრეტულ საკითხებში, რასაც ეუთო აყენებს,“ - განაცხადა გიგი წერეთელმა.
ეუთო-ს საპარლამენტო ასამბლეა თბილისში, 3 საათიდან დაიწყებს მუშაობას - ოფიციალურ გახსნამდე, ეუთოს საპარლამენტო ასამბლეის 25-ე ყოველწლიური სესია მთავარი კომიტეტის სხდომით გაიხსნა. კომიტეტის სხდომა მედიისთვის დახურულია.
როგორც ცნობილია, კომიტეტის სხდომაზე, საქართველომ წარადგინა რეზოლუცია, რომელიც ეხება საქართველოს ოკუპირებულ ტერიტორიებს, დევნილების უფლებებს და დეოკუპაციის საკითხებს.
თბილისში იმყოფება ეუთოს საპარლამეტნო ასამბლეის რუსული დელეგაცია. მათი თქმით, ისინი ეუთოს საპარალმენტო ასამბლეის პრეზიდენტის პოსტზე გიგი წერეთლის კანდიდატურას მხარდაჭერას უცხადებენ.
„რაც შეეხება გიგი წერეთლის კანდიდატურას, ჩვენ შევთანხმდით, რომ მას მხარს დავუჭერთ. იმედი მაქვს, რუსეთი ამ საკითხში მარტო არ იქნება და ეს ადამიანი ღირსეულ ადგილს დაიკავებს ეუთოს საპარლამენტო ასამბლეის სათავეში. ჩვენი სურვილი იყო, რომ ეუთოს საპარლამენტო ასამბლეას ესაუბრა თანამშრომლობაზე. არსებობს შესწორებები და კონკრეტული წინადადებები რომლებსაც შევეხებით,“ - განაცხადა ეუთოს საპარლამენტო ასამბლეის რუსეთის დელეგაციის ხელმძღვანელმა ნიკოლაი კოვალიოვმა
