პარლამენტის თავმჯდომარე დავით უსუფაშვილი აცხადებს, რომ ეუთო-ს ღონისძიებაში მონაწილეობისთვის თბილისში, რუსულ დელეგაციას პრობლემები არ შეექმნება. მისი თქმით, ამის შესახებ პირობა საქართველოს ხელისუფლებამ ეუთო-ს პირობა მისცა.
რაც შეეხება „საქართველოს ოკუპირებულ ტერიტორიების შესახებ“ კანონის დარღვევას, უსუფაშვილის განმარტებით, როდესაც მიმდინარეობა ეუთო-ს ღონისძიება, ყველა იმყოფება ეუთო-ს ტერიტორიაზე.
,,მინდა შეგახსენოთ, რომ საქართველო ეუთო-ს საპარლამენტო ასამბლეას მასპინძლობს. ეს არის ეუთო-ს ღონისძიება. ამ თვალსაზრისით ჩვენ ახლა ეუთო-ს ტერიტორიაზე ვიმყოფებით. როდესაც ჩვენ ეუთო-სთან ამ თემაზე გვქონდა საუბარი, როგორც მიღებულია საერთაშორისო ურთიერთობების პრაქტიკაში, ეუთოს შევპირდით, რომ ასამბლეის მონაწილე დელეგატებს საქართველოში არანაირი პრობლემა არ შეექმნებათ, ვიდრე ისინი ეუთო-ს ღონისძიებებში მონაწილეობენ. ეს ეხება რუსეთის დელეგაციასაც, ესპანეთის დელეგაციასაც, აშშ-ს დელეგაციასაც და საერთოდ ყველას. თუკი ვინმეს კანონი აქვს დარღვეული, სამართალდამცავი ორგანოები კანონით გათვალისწინებულ ზომებს მიიღებენ, მაგრამ ამავე დროს აქ მუშაობის პროცესში ხელი არავის შეეშლება. ”საქართველოს ოკუპირებული ტერიტორიების შესახებ” კანონი მოქმედებს და ის მოქმედებს ყველა დღეს და ყველა წუთს. ამასობაში ჩვენი საერთაშორისო ვალდებულებაა, რომ ეუთო-ს საპარლამენტო ღონისძიებებში მონაწილეობის პროცესში ხელი არავის შეეშალოს. საერთაშორისო ვალდებულებები არის უფრო მნიშვნელოვანი, ვიდრე ჩვენი შიდა კანონმდებლობა“, - აცხადებს უსუფაშვილი.
პარლამენტის თავმჯდომარემ აქვე ხაზი გაუსვა, რომ „ნაციონალური მოძრაობის“ წარმომადგენელმა, ასამბლეის ვიცე-თავმჯდომარემ გიგი წერეთელმა მასთან ერთად მისცა პირობა ეუთო-ს, რომ საქართველოში ყველა ქვეყნის დელეგაცია შეუფერხებლად იმუშავებს.
„ამიტომ, ჩვენ ამ თემის გარშემო აჟიოტაჟი არ გვჭირდება. გვჭირდება იმ საკითხებზე სერიოზული ყურადღების გამოჩენა, რაც ეუთოს საპარლამენტო ასამბლეის მიერ არის მისაღები“, - დასძინა უსუფაშვილმა.
