,,ერთიანი ნაციონალური მოძრაობის“ საგარეო ურთიერთობათა მდივანი გიგა ბოკერია GFK-ის კვლევის შედეგებს ეხმაურება და აცხადებს, რომ ბიძინა ივანიშვილს მოუწევს რეალობასთან შეგუება. მისი თქმით, GFK-ის კვლევა ასახავს იმას, რომ ამომრჩევლების კრიტიკულ მასას ესმის, რომ ,,რუსთავი 2» -ის თემა სერიოზული პრობლემაა.
,,ჩემთვის ორი აზრი არ არსებობს. ეს პოლიტიკური პროცესი კი არაა, ესაა მცდელობა ივანიშვილის მხრიდან, ოღონდ წარუმატებელი და ბოლომდე წარუმატებლად დარჩება, რომ რუსთავი 2-ის გაჩუმებით მან შეძლოს ქართველი ხალხის ნების საწინააღმდეგოდ ძალაუფლების შენარჩუნება არჩევნებზე. ეს არ მოხდება. სჯობს, რომ გონს მოეგოს და შეეგუოს ამომრჩევლებისა და ხალხის ნებას. GFK-ის კვლევაც ასახავს იმას, რომ ამომრჩევლების კრიტიკულ მასას ესმის, რომ ესაა სერიოზული პრობლემა ქვეყნისთვის. მაშინ, როცა ხდება გაღარიბება და ქვეყანა უფსკრულისკენ მიექანება, ერთადერთი სადარდებელი ივანიშვილისა და მისი მარიონეტებისთვს არის ის, თუ როგორ ჩაახშონ ის ინსტრუმენტები, რომლებიც ხალხის თავისუფალი ნების გამოხატვას უწყობს ხელს არჩევნებზე”, - განაცხადა გიგა ბოკერიამ.
სამაუწყებლო კომპანია „რუსთავი 2“-ის დაკვეთით გერმანულ-ამერიკულმა ორგანიზაცია GFK-მ სოციოლოგიური კვლევები გამოაქვეყნა. კითხვა ასე იყო დასმული, "რუსთავი 2"-ის საქმესთან დაკავშირებით ჩამოთვლილთაგან რომელი უკეთ ასახავს თქვენს დამოკიდებულებას?
ტელეკომპანია „რუსთავი 2“-ის ინფორმაციით, პასუხები ასე გადანაწილდა - კერძო დავა - 29.3%; პოლიტიკურად მოტივირებულია - 38.9%; ორივე - 14.4%; უარი პასუხზე - 3.8%; არ ვიცი - 13.9%;
რაც შეეხება პოლიტიკური პარტიების რეიტინგებს, ელჩის განმარტებით, კვლევები მხოლოდ ერთ კონკრეტულ სურათს იძლევა.
„მე ეს კვლევის შედეგები არ მინახავს, თუმცა გამოკითხვის შესახებ ვნახე მედიაში გავრცელებული ინფორმაცია და მინდა მოგახსენოთ, რომ ზოგადად ეს კვლევები გვაძლევს მხოლოდ ერთ კონკრეტულ სურათს, დროის ამ მონაკვეთში რა მდგომარეობაა და ამიტომ ეს რიცხვები, რა თქმა უნდა ოქტომბრამდე, არჩევნებამდე შესაძლოა, შეიცვალოს”, - განაცხადა ელჩმა.
კვლევის მიხედვით, კითხვაზე - თუ ჩავთვლით, რომ 8 ოქტომბრის საპარლამენტო არჩევნებში მონაწილეობთ, რომელ პარტიას მისცემდით ხმას, გამოკითხულთა 22.4%-მა დაასახელა "ქართული ოცნება", "ერთიანი ნაციონალური მოძრაობა" კი - 21.7%-მა; გამოკითხულთა 7.8% "სახელმწიფო ხალხისთვის - პაატა ბურჭულაძეს" ასახელებს.
