"ნაციონალურ მოძრაობაში" მიიჩნევენ, რომ ვანო მერაბიშვილის ციხიდან გაყვანის ფაქტზე პროკურატურის მიერ გამოძიების დაწყება ამ ეტაპზე არაადეკვატური და დაგვიანებულია. . ენმ-ის წევრ ლევან თარხნიშვილის განცხადებით, სტრასბურგის სასამართლოს გადაწყვეტილებაზე ადეკვატური ვანო მერაბიშვილის უპირობო გათავისუფლება იქნებოდა.
“ეს არის ყოვლად არაადეკვატური და დაგვიანებული პასუხი სტრასბურგის სასამართლოს გადაწყვეტილებამდე. ეს იქნებოდა ნორმალური და ადეკვატური ორი წლის წინ, ასეთი გამოძიების დაწყება. დღევანდელ დღეს ადეკვატური პასუხი ხელისუფლების და მთავრობის მხრიდან იქნება და იქნებოდა, ვანო მერაბიშვილის უპირობო გათავისუფლება, ისევე როგორც სხვა ყველა პოლიტ პატიმრის გათავისუფლება. რაც შეეხება ფარცხალაძეს, ის რა თქმა უნდა, უნდა დაიკითხოს, მაგრამ ეს არ არის საკმარისი პასუხი სტრასბურგის სასამართლოს გადაწყვეტილებაზე“ - განაცხადა თარხნიშვილმა.
მთავარმა პროკურატურამ ვანო მერაბიშვილის საკნიდან გაყვანის ფაქტზე გამოძიება დაიწყო.
”ადამიანის უფლებათა ევროპული სასამართლოს 2016 წლის 14 ივნისის გადაწყვეტილების საფუძველზე საქართველოს მთავარი პროკურატურის საგამოძიებო ნაწილში დაიწყო გამოძიება ცალკეულ საჯარო მოხელეთა მიერ სამსახურებრივი უფლებამოსილების შესაძლო გადამეტების ფაქტზე, სისხლის სამართლის კოდექსის 333-ე მუხლის პირველი ნაწილით გათვალისწინებული დანაშაულის ნიშნებით”, - აცხადებენ პროკურატურაში.
