სტრასბურგის ადამიანის უფლებათა სასამართლოს მიერ აღიარებულია, რომ საქართველოს პოლიტპატიმრები ჰყავს, ამის შესაებ ”ჯი-ეიჩ-ენს” საქართველოს პარლამენტის წევრმა ”ერთიანი ნაციონალური მოძრაობიდან” გივი თარგამაძემ ევროსასამართლოს მიერ ვანო მერაბიშვილის საქმეზე მიღებული გადაწყვეტილების კომენტირებისას განუცხადა.
მისი თქმით, სტრასბურგის ადამიანის უფლებათა სასამართლომ ერთხმად დაადგინა, რომ საქართველოს ყოფილი პრემიერ მინისტრი ვანო მერაბიშვილი პოლიტპატიმარია.
”ადამიანის უფლებათა სასამართლო მიიჩნევს, რომ მერაბიშვილის წინასწარი პატიმრობა იყო დაუსაბუთებელი და მიზნად ისახავდა მისთვის პოლიტიკური საქმიანობის შეზღუდვას”, - განაცხადა თარგამაძემ და დასძინა, ”სასამართლომ პარალალი გაავლო ლუცენკოსა და ტიმოშენკოს საქმეებთან”.
მისი თქმით, მერაბიშვილის საქმეზე გადაწყვეტილების გამოტანამდე სტრასბურგის ადამიანის უფლებათა სასამართლოს ევროკონვენციის 18-ე მუხლის დარღვევაზე გადაწყვეტილება 6 აქვს მიღებული.
”სტრასბურგის ადამიანის უფლებათა სასამართლომ 18-ე მუხლის დარღვევა, ანუ პოლიტიკური მოტივით დევნა თავის ისტორიაში სულ ექვსჯერ დაადგინა. აქედან სულ ორ პოლიტიკოსზე - იური ლუცენკოსა და იულია ტიმოშენკოზე”, - განაცხადა თარგამაძემ და დასძინა, - ”ჩვენს მეზობელ, მეგობარ აზერბაიჯანში ასეთი განაჩენის დადგომისთანავე მყისიერად იქნა გათავისუფლებული მსჯავრდებული ბლოგერი.
ანალოგიური განაჩენის შემდეგ იანუკოვიჩი იძულებული გახდა, გაეთავისუფლებინა იური ლუცენკო. მან არ გადადგა იგივე ნაბიჯი იულია ტიმოშენკოზე ასეთივე გადაწყვეტილების შემდეგ და სულ მალე თავად მოუწია სამარცხვინოდ ქვეყნიდან გაქცევა”.
თარგამაძემ აღნიშნა, რომ საქართველოს სტრასბურგის ადამიანის უფლებათა სასამართლოს მიერ აღიარებული პოლიტპატიმრები ჰყავს.
”ამიერიდან საქართველოს სტრასბურგის ადამიანის უფლებათა სასამართლოს მიერ აღიარებული პოლიტპატიმრები ჰყავს”, - განუცხადა ”ჯი-ეიჩ-ენს” გივი თარგამაძემ.
