ყოფილი პრემიერ-მინისტრის ბიძინა ივანიშვილის შეფასებით, არსებული ტიპის დემოკრატია შეიცავს გარკვეულ ხიფათს, რომ შეჭირვებულმა მოსახლეობამ სწორი ანალიზი ვერ გააკეთოს და ხელისუფლების ბრალეულობად ჩათვალოს, ის, რაც ხდება.
გამოცდების ეროვნულ ცენტრში სამოქალაქო განათლების ოლიმპიადის გამარჯვებულებთან შეხვედრაზე მან კიდევ ერთხელ ისაუბრა მის მიერ გამოქვეყნებულ ღია წერილზე და სამოქალაქო საზოგადოების როლზე ქვეყნის განვითარებაში.
,,თუ ვერ მოვახერხებთ იმ მინიმალური მოვალეობის შესრულებას რაც მოქალაქეს აკისრია, მივიღებთ ბევრ გაუგებრობას. ჩვენ საოცარი გარდატეხა მოვახდინეთ ოთხი წლის განმავლობაში, ის რომ დიქტატურისკენ მიმავალი ქვეყანა დემოკრატიის რელსებზე გადავსვით, არ იყო მარტივი. ამას დაჟინებული შრომა სჭირდებოდა. ეს ხელიდან არ უნდა გავუშვათ, მითუმეტეს დემოკრატიულ ღირებულებებს, რომელიც დაინერგა ახალი გუნდის მოსვლის შემდეგ და ახლოსაა ევროპულთან, სჭირდება გაღრმავება. ამ დროს ეკონომიკა ძალიან განსხვავდება ევროპული ეკონომიკისგან, ერთ სულ მოსახლეზე წარმოებული პროდუქტით 6-ჯერ და უფრო მეტჯერ ჩამოვრჩებით განვითარებულ ევროპულ ქვეყნებს. ამ დროს ასეთი ტიპის დემოკრატია შეიცავს გარკვეულ ხიფათსაც, რომ შეჭირვებულმა მოსახლეობამ, რომელიც საკმაოდ გვყავს ჩვენს ქვეყანაში, შეიძლება სწორი ანალიზი ვერ გააკეთოს და ხელისუფლების ბრალეულობად ჩათვალოს ის რაც ხდება“, - განაცხადა ბიძინა ივანიშვილმა.
მისივე თქმით, 25 წელი მოჯადოებულ წრეზე დავდივართ და ეს წრე 2012 წლის არჩევნებზე გაიხსნა.
,,საქართველოში ყველაფერი მორგებულია ადამიანის უფლებებზე, თუმცა პარალელურად ირღვევა ადამიანის ერთ-ერთი ძირეული უფლება, იშოვოს ღისეული სამუშაო ადგილი.
ეს გაჭირვება არის. 3-4 წელიწადში ამას ვერ მოვერეოდით და ვერც მოვერიეთ, თუმცა ტენდენცია კარგია და აუცილებლად მივაღწევთ გამარჯვებას“, - განაცხადა ივანიშვილმა და აღნიშნა, რომ ამ გამარჯვებას 10-15 წელიწადი დასჭირდება თუ იქნება შენარჩუნებული პოლიტიკური სტაბილურობა.
