ნატო ძალიან სერიოზულად ეკიდება იმ საფრთხეს, რომელიც ევროპული უსაფრთხოებისთვის რუსეთიდან მოდის, - ამის შესახებ ”ჯი-ეიჩ-ენს” ატლანტიკური საბჭოს თავმჯდომარემ დავით სიხარულიძემ განუცხადა.
მისი თქმით, ჯერ კიდევ უელსის სამიტზე გამოიკვეთა ნატოს ახალი სტრატეგიის კონტურები, რაც ალიანსისთვის იქნება პრიორიტეტული რუსეთის აგრესიის შესაკავებლად.
”უელსის სამიტიდან დღემდე ალიანსის მიერ გადადგმული იყო კონკრეტული ნაბიჯები ორი მიმართულებით. ერთი - გარანტიები მიეცათ წევრი სახელმწიფოებისთვის ალიანის წესდების მეხუთე მუხლთან დაკავშირებით და მეორე - პარტნიორი ქვეყნების თავდაცვითი შესაძლებლობების განვითარება”, - განაცხადა სიხარულიძემ.
სიხარულიძე აცხადებს, რომ ვარშავის სამიტზე უელსში დასახურლი კონტურები უფრო მკვეთრად გამოიხატება.
”ვარშავის სამიტისგან ველოდები, რომ რუსეთის შეკავების სტრატეგია მკვეთრად გამოხატება. შესაბამისად, საქართველოს თადაცვისუნარიანობის განმტკიცებისათვისაც ნაბიჯები იქნება გადადგმული”, - განაცხადა სიხარულიძემ.
ატლანტიკური საბჭოს თავმჯდომარე არსაკმარისად მიიჩნევს საქართველოს მთავრობის მიერ გაწეულ საქმიანობას ალიანსთან თანამშრომლობის მიმართულებით და კონკრეტულად, მთავრობის არაკოორდინირებულობაზე საუბრობს.
”ვფიქრობ საჭირო იყო და არის უფრო მეტად კოორდინირებული ერთიანი სამთავრობო სტრატეგია და ძალისხმევა იმისათვის, რომ საქართველოსათვის მეტი პოლიტიკური შედეგი იყოს ვარშავის სამიტზე. თუმცა წინ ნუ გავუსწრებთ მოვლენებს. რადგან ვარშავის სამიტი ძალიან მნიშვნელოვანი თემაა მთლიანად ევროპული კონტინეტისთვის. უმთავრესია, თუ როგორ მოხდეს რუსეთის აგრესიის შეკავება. ევროპაში კარგად ესმით რომ რუსეთის აგრესია მიმართულია არა მხოლოდ მისი უშუალო მეზობლების, არამედ მთლიანად ევროპული უსაფრთხოებისა და სტაბილურობის წინააღმდეგ”, - განაცხადა ”ჯი-ეიჩ-ენთან” საუბარში სიხარულიძემ და დასძინა, - “ნატოს ვარშავის სამიტის დღის წესრიგში მთლიანად ევროპაში და კერძოდ, შავი ზღვის რეგიონშიც, უსაფრთხოების და სტაბილურობის განმტკიცების მიმართულებით სერიოზული ნაბიჯები იქნება გადადგმული. ეს, სავარაუდოდ, საქართველოს თავდაცვისუნარიანობის განმტკიცებას, საქართველოს ნატოში გაწევრიანების პერსპექტივებსაც შეეხება.”
