ფალუჯას გათავისუფლებისთვის მებრძოლმა, ერაყის შეიარაღებულმა ძალებმა, მასობრივი სამარხი აღმოაჩინეს. სამარხში ნაპოვნ 400 ცხედარს შორის არიან “ისლამური სახელმწიფოს” მებრძოლების მიერ მოკლული სამხედროები და მშვიდონიანი მოქალაქეები. ინფორმაციას ადასტურებენ ერაყის შეიარაღებულ ძალებსა და პოლიციაში. მათი ინფორმაციით, მშვიდობიანი მცხოვრებლები ჯიჰადისტებმა ჯაშუშობისა და ორგანიზაციის წესების დაუმორჩილებლობისთვის მოკლეს.
4 ივნისს ერაყის შეიარაღებულმა ძალებმა ფალუჯას მახლობლად მდებარე ქალაქ საკლავია გაათავისუფლეს. დედაქალაქ ბაღდადიდან 50 კილომეტრში მდებარე ფალუჯას გასათავისუფლებლად ოპერაცია ერაყის არმიამ ორი კვირის წინ დაიწყო.
ფალუჯა ერაყის პირველი ქალაქი იყო, რომელიც 2014 წელს ექსტრემისტულმა დაჯგუფებამ “ისლამურმა სახელმწიფომ” დაიკავა. ფალუჯა სტრატეგიული მნიშვნელობის ქალაქია, რადგან მისზე ბაღდადიდან სირიისა და იორდანიის მიმართულებით ავტომაგისტრალები გადის.
