პრეზიდენტის მრჩეველი კახა კოჟორიძე ბიძინა ივანიშვილის მიერ ლევან მურუსიძესთან დაკავშირებით გაკეთებულ განცხადებას ეხმაურება, რომლის თანახმადაც, ის სისტემის მსხვერპ;ი იყო და ამჟამად ენმ-ის წნეხისგან გათავისუფლებულია.
კოჟორიძის შეფასებით, გამოდის, რომ საზოგადოება, რომელიც ამ მოსამართლეების მიმართ კრიტიკულადაა განწყობილი, ჯალათები არიან.
„თუ მოსამართლეები, რომლებიც უსამართლო გადაწყვეტილებებს იღებდნენ, მსხვერპლები არიან, მაშინ საზოგადოება, რომელიც ამ მოსამართლეებთან მიმართებაში კრიტიკულ პოზიციებს და მიუღებლობას აფიქსირებს, გამოდის, რომ ეს საზოგადოება ჯალათია და ამ მსხვერპლებს ახლა ასეთ პოზიციებს უყენებს. მსხვერპლი უსამართლო გადაწყვეტილების მიმღები მოსამართლე კი არა მოქალაქეა, რომელიც უსამართლო გადაწყვეტილებით დაზარალდა და ვერანაირი სისტემა ვერ გაამართლებს ვერც ერთ მოსამართლეს, ან რომელიმე სახელმწიფო მოხელეს უსამართლო გადაწყვეტილების მიღებაში“, - განაცხადა კახა კოჟორიძემ და დასძინა, რომ მოსამართლეთა შერჩევა-დანიშვნის დროს აქცენტი უნდა გაკეთდეს პროფესიონალებზე, რომლებმაც სისტემის წნეხსაც გაუძლეს და ასეთები სისტემაში ნამდვილად არიან.
,,თუ ასეთი მოსამართლეები სისტემაში ვერ მოიძებნა, სასურველია, ფსონი ახალ ადამიანებზე გაკეთდეს, რომლებიც ასევე პროფესიონალები არიან'', - აღნიშნა კოჟორიძემ.
