დღეს ხელი მოეწერა ხელშეკრულებას საქართველოსა და ჩინეთს შორის ეკონომიკურ-ტექნიკური თანამშრომლობის შესახებ, რომელიც ითვალისწინებს ჩინეთის სახალხო რესპუბლიკის მიერ საქართველოს მხარდაჭერის გაგრძელებას,- განაცხადა ნოდარ ხადურმა მთავრობის ადმინისტრაციაში გამართული შეხვედრის შემდეგ.
ფინანსთა მინისტრის თქმით, საუბარი შეეხება 9,1 მილიონ დოლარს, რომელიც 60 მილიონი იუანია და, რომელიც საქართველოს ორ რეგიონში ჯანმრთელობის ობიექტების რეაბილიტაციას მოხმარდება.
"ეს არ არის პირველი დახმარება. დღეისათვის საქართველოში მიმდინარეობს ძალიან საინტერესო პროექტი, ირიგაციის და სასათბურე მეურნეობის სოფლის მეურნეობაში. ფინანსთა სამინისტროს შემოსავლების სამსახურმა მიიღო სკანერები, რომელიც დამონტაჟებულია, მათ შორის ლარსის გამშვებ პუნტქზე, ასევე მოძრავი სკანერები, რომელიც მუშაობს საქართველოს საბაჟო სივრცეში. ჩვენი თანამშრომლობა გაგრძელდება", - აღნიშნა ნოდარ ხადურმა.
საქართველოს მთავრობის ადმინისტრაციაში, მთავრობის წევრებსა და ჩინეთის სახალხო რესპუბლიკის სახელმწიფო საბჭოს ვიცე-პრემიერს ჭანგ გაოლის შორის გაფართოებულ შეხვედრა გაიმართა.
