აჭარის 2016 წლის იანვარ-მაისის ნაერთი ბიუჯეტი ბიუჯეტი 14,9 %-იანი გადაჭარბებით შესრულდა. აჭარის ფინანსთა და ეკონომიკის სამინისტროს ინფორმაციით, 5 თვის ნაერთი ბიუჯეტის გეგმა 76 მლნ 587 ათას 200 ლარს შეადგენდა, თუმცა საანგარიშო პერიოდში ბიუჯეტში 88 მლნ 10 ათას 600 ლარის აკუმულირება მოხდა, რაც იმას ნიშნავს, რომ ბიუჯეტის ხუთი თვის გეგმა 114,9 %-ით შესრულდა.

სტატისტიკური ინფორმაციის მიხედვით, აჭარის იანვარ-მაისის ნაერთი ბიუჯეტის გადასახადების მუხლი - 112,4 %-ით, სხვა შემოსავლების მუხლი - 127,4 %-ით, ხოლო არაფინანსური აქტივების (კლება) მუხლი 111,2 %-ით შესრულდა. რაც შეეხება რესპუბლიკურ ბიუჯეტს, როგორც აჭარის ფინანსთა და ეკონომიკის სამინისტროში განმარტავენ, იანვარ-მაისის რესპუბლიკური ბიუჯეტი 14,6 %-ით გადაჭარბდა.

სამინისტროს ინფორმაციით, აჭარის 2016 წლის 5 თვის აჭარის რესპუბლიკური ბიუჯეტის გეგმა 55 მლნ 486 ათას 100 ლარი იყო, თუმცა 31 მაისის მდგომარეობით შესრულებამ 63 მლნ 561 ათასი ლარი შეადგინა, ანუ გეგმა 114,6 %-ით შესრულდა. 5 თვის აჭარის რესპუბლიკურ ბიუჯეტის სტატისტიკური ანალიზი აჩვენებს, რომ გადასახადების მუხლი 114,8 %-ითაა შესრულებული, სხვა შემოსავლების მუხლი კი 165,6 %-ით.

რაც შეეხება არაფინანსური აქტივების (კლება) მუხლს, რეგიონის მთავრობამ გეგმა ვერ შეასრულა, რადგანაც ის მხოლოდ 63,8 %-ითაა შევსებული. იანვარ-მაისის მონაცემებით ბათუმის თვითმართველი ბიუჯეტი 12,8 %-ით გადაჭარბდა, 25,8 %-იანი გადაჭარბებით შესრულდა ასევე ხელვაჩაურის ბიუჯეტი. რაც შეეხება შუახევისა და ხულოს ბიუჯეტს, აქ საკმაოდ კარგი მაჩვენებლები დაფიქსირდა, უფრო კონკრეტულად კი შუახევის ბიუჯეტი - 348,1 %-ით, ხოლო ხულოს ბიუჯეტი - 524 %-ით შესრულდა. სამაგიეროდ გარღვევაა ქობულეთისა და ქედას მუნიციპალურ ბიუჯეტებში.

სტატისტიკა აჩვენებს, რომ იანვარ-მაისში ქობულეთის მუნიციპალური ბიუჯეტი მხოლოდ 71,9 %-ით, ქედას ბიუჯეტი კი 61,1 %-ით შესრულდა.