აჭარის ტურიზმის დეპარტამენტმა უცხოელ ვიზიტორთა კვლევის შედეგები გამოქვეყნა, რომლის მიხედვითაც გამოიკვეთა თუ საშუალოდ რამდენი ხნით სტუმრობს ტურისტი აჭარას და როგორია მისი ხარჯები. კვლევა 2015 წლის აგვისტოდან დეკემბრის ჩათვლით უცხოელ ვიზიტორთა გამოკითხვის შედეგებს ითვალისწინებს და ის თავის მხრივ ორ პერიოდადაა დაყოფილი.
„კვლევის შედეგად გამოიკვეთა საშუალოდ რამდენი ხნით სტუმრობს აჭარას ტურისტები, რა არის მათი მოგზაურობის ძირითადი მიზანი, საშუალოდ რამდენს ხარჯავენ ისინი რეგიონში ყოფნისას, რა მოსწონთ აჭარის მონახულებისას, რამდენად აქვთ განმეორებითი ვიზიტის სურვილი და რა ტიპის პრობლემებს ხედავენ ისინი რეგიონში დასვენებისას. კვლევის შედეგები გაანალიზებულია 10-ვე სამიზნე ქვეყნების მიხედვით, რაც საშუალებას იძლევა ნათლად გამოჩნდეს ტურისტების საჭიროებები, მათი კმაყოფილებისა თუ უკმაყოფილების დონე ცალკეული ქვეყნების მიხედვით,“- განაცხადა აჭარის ტურიზმის დეპარტამენტის თავმჯდომარე მამუკა ბერძენიშვილმა.
ბერძენიშვილმა განმარტა, კვლევის შედეგები ერთის მხრივ საშუალებას იძლევა, აჭარის ტურიზმის დეპარტამენტმა პიარ და მარკეტინგული ღონისძიებების დაგეგმვისას ქვეყნების მიხედვით გაითვალისწინოს თუ რეგიონის რომელ ტურისტულ პროდუქტებსა და პოტენციალს გაუწიოს პოზიციონირება კონკრეტულ ქვეყანაში და რა გზებით.
გარდა ამისა, რა ტიპის პრობლემებს აწყდება ტურისტები რეგიონში სტუმრობისას და როგორ შეიძლება მათი მოგვარების გზების დაგეგმვა და განხორციელება. უცხოელ ვიზიტორთა კვლევა გრძელდება და 2016 წლის მონაცემებს დეპარტამენტი კვლევების დასრულებისას წარადგენს.
როგორც უცხოელ ვიზიტორტა 2015 წლის აგვისტო - სექტემბერის კვლევა აჩვენებს, გამოკითხულ რესპონდენტთა უმრავლესობა პირველად სტუმრობდა აჭარას. კითხვას იყო თუ არა ეს მათი პირველი ვიზიტი აჭარაში ვიზიტორთა 58% -მა დადებითად უპასუხა.
როგორც კვლევამ აჩვენა უცხო ქვეყნის მოქალაქეები ძირითადად მეგობრებთან (37.4%) და ოჯახთის წევრებთან (34.2%) ერთად მოგზაურობდნენ. აჭარას ინდივიდუალურად მხოლოდ გამოკითხულთა 23.7% სტუმრობდა, ხოლო დანარჩენი თანამშრომლებთან (4.7%) ერთად.
ვიზიტის ხანგრძლივობა საშუალოდ 4 ღამეს შეადგენდა, ხოლო გატარებული ღამეების რაოდენობა თითოეული მონახულებული ადგილისათვის იხილეთ ქვემოთ მოყვანილ ცხრილში.
აღსანიშნავია ისიც, რომ გამოკითხული ტურისტების მხოლოდ 26,80% -მა წინასწარ დაჯავშნა საცხოვრებელი ადგილი, ხოლო დანარჩენმა (73,20%) აჭარაში ჩამოსვლის შემდგომ მოახდინა ბინის შერჩევა.
მიმდინარე კვლევის პერიოდში აჭარაში ვიზიტის ძირითადი მიზანი იყო დასვენება, გართობა, რეკრეაცია.
რესპონდენტთა მხოლოდ 6% - მა დაგეგმა მოგზაურობა ტურისტული სააგენტოს დახმარებით. აქედან მხოლოდ 1%-მა ისარგებლა ქართული ტურისტული სააგენტოს / ტურ-ოპერატორის სერვისით.
გარდა ამისა, შეძენილი ტურისტული პაკეტებიდან მხოლოდ 42% მოიცავდა სხვა ქვეყანაში ვიზიტს. ხოლო, თუ რას მოიცავდა შეძენილი ტურისტული პაკეტი, იხილეთ ქვემოთ მოყვანილ დიაგრამაში.
კითხვაზე, თუ რა პრობლემები შეექმნათ აჭარაში ვიზიტისას, რესპონდენტების უმეტესებამ მიუთითა დაბალი დონის მომსახურებაზე, სიძვირეზე და მოუწესრიგებლობაზე რეგიონში.
თუმცა, ამავდროულად ვიზიტორებს გაუჭირდათ დაესახელებინათ რაიმე სახის სერვისი/მომსახურება, რის მიღებასაც ისინი ისურვებდნენ მომავალი ვიზიტისას აჭარაში. გამოკითხულთა 84.4%-მა ვერ დაასახელა რაიმე სახის დამატებითი სერვისი.
თუმცა როგორც ოქტომბერ-დეკემბრის კვლევის შედეგებით ირკვევა, უცხო ქვეყნის მოქალაქეები აჭარაში ძირითადად მეგობრებთან ერთად (48%) ან ინდივიდუალურად (30.3%) მოგზაურობდნენ. აჭარას ოჯახთან ერთად მხოლოდ გამოკითხულთა 18.8% სტუმრობდა, ხოლო დანარჩენი თანამშრომლებთან / კოლეგებთან (2.9%) ერთად.
ვიზიტის ხანგრძლივობა საშუალოდ 3.44 ღამეს შეადგენდა, ხოლო გატარებული ღამეების რაოდენობა თითოეული მონახულებული ადგილისათვის იხილეთ ქვემოთ მოყვანილ ცხრილში.
აღსანიშნავია ისიც, რომ გამოკითხული ტურისტების მხოლოდ 27,20% -მა წინასწარ დაჯავშნა საცხოვრებელი ადგილი, ხოლო დანარჩენმა (72,80%) აჭარაში ჩამოსვლის შემდგომ მოახდინა ბინის შერჩევა.
მიმდინარე კვლევის პერიოდში აჭარაში ვიზიტის ძირითადი მიზანიიყო დასვენება, ღირსშესანიშნაობების, ბუნების მონახულება.
როგორც ჩანს, შემოდგომის პერიოდში ვიზიტორთა უმრავლესობა (90%-ზე მეტი) დაინტერესებულია ეკო ტურიზმით.
კვლევა აჩვენებს, რომ რესპონდენტთა მხოლოდ 2% - მა დაგეგმა მოგზაურობა ტურისტული სააგენტოს დახმარებით. მხოლოდ 1%-მა ისარგებლა ქართული ტურისტული სააგენტოს / ტურ-ოპერატორის სერვისით.
გარდა ამისა, შეძენილი ტურისტული პაკეტებიდან მხოლოდ 14% მოიცავდა სხვა ქვეყანაში ვიზიტს. ხოლო, თუ რას მოიცავდა შეძენილი ტურისტული პაკეტი, იხილეთ ქვემოთ მოყვანილ დიაგრამაში.
„თუმცა, ამავდროულად ვიზიტორებს გაუჭირდათ დაესახელებინათ რაიმე სახის სერვისი/მომსახურება, რის მიღებასაცისინი ისურვებდნენ მომავალი ვიზიტისას აჭარაში. გამოკითხულთა 93.4%-მა ვერ დაასახელა რაიმე სახის დამატებითი სერვისი.
უცხოელ ვიზიტორთა უმრავლესობა მიუხედავად ყველაფრისა საერთო ჯამში კმაყოფილი დარჩა რეგიონში ვიზიტით (ზოგადად ძალიან კამყოფილია 57.4% .
რესპონდენტთა უმეტესობამ (90%-ზე მეტი) გამოთქვა სურვილი კიდევ ერთხელ ეწვიოს რეგიონს და აგრეთვე გაუწიოს რეკომენდაცია თავიანთ ნაცნობებს მოინახულონ აჭარა. თუმცა იყვნენ ისეთებიც, ვისაც განმეორებითი ვიზიტის არანაირი სურვილი არ გააჩნია“, აღნიშნულია კვლევაში.
