ევროპარლამენტმა რუსეთის სახელმწიფო დუმასთან კონტაქტების აღდგენის გადაწყვეტილება მიიღო. ,,რადიო თავისუფლების” ინფორმაციით, გუშინ, ევროპარლამენტის სხდომაზე მიღებული გადაწყვეტილებით, ევროპარლამენტი 14-16 ივნისს, რუსეთში დაგეგმილ არქტიკის რეგიონის პარლამენტარების კონფერენციაზე დეპუტატებს გააგზავნის. გარდა ამისა, რუსეთის სახელმწიფო დუმის წევრებს მიიწვევენ კონფერენციაზე, რუსეთში დაგეგმილი საპარლამენტო არჩევნების განსახილველად.
ევროპარლამენტი არ აღადგენს კონტაქტებს იმ რუს დეპუტატებთან, რომლებიც ევროკავშირის ”შავ სიაში” არიან შეყვანილი. თუმცა, წყაროს ცნობით, ევროპარლამენტმა დუმასთან კონტაქტების აღდგენა იმის გამო გადაწყვიტა, რომ ევროკავშირის წევრი ქვეყნების ზოგიერთი მთავრობის წარმომადგენელმა და ევროკომისიამ რუსეთის მთავრობასთან შეხვედრები გამართა. ევროპარლამენტმა სახელმწიფო დუმასთან ურთიერთობა მას შემდეგ გაწყვიტა, რაც რუსეთმა 2014 წლის მარტში ყირიმის ანექსია მოახდინა.
